Federasyonê Komeleyan ê Dêrsimî (DEDEF) vera kerdişanê seydwanîye yê Dêrsimî Rihtimê Kadikoyî de eşkerayîyêke daye. Eşkerayîye de pankarta bi nuşteyê ''Seydwanîye cînayet a, wa bêra qedexekerdene'' ameye akerdene û sloganî ameyî vatene.

Wekîlê HDPyî Musa Pîroglu zî tewrê eşkerayîye bi. Eşkerayîye hetê Sekreterê Pêroyî yê DEDEFî Hasan Şenî ra ameye wendene.

 Şenî ard ziwan ke xozaya Dêrsimî şewatê daristanan û madenan ra dima nika zî tehlukeyê seydwanîye de têrî yo û vat: ''Dewijî nêeşkenê daristanan de bigêrê la seydwanan rê pêro îmkanî yenê pêşkêşkerdene. Seydwanî eşkenê şorê herêmanê qedexeyan û pezkovîyan û heywananê ma yê bînan bikişê. Ma wazenê gandarî Dêrsim de bi azadî biciwîyê. Selahîyetdarî qirkerdişê heywanan peygoş kenê.''

Şenî da zanayene ke tay dêrsimijî hemkarîya seydwanan kenê û vat: ''Tay hemkarî binê nameyê turîzmê seydwanîye de nê kerdişan meşrû kenê. Ma venga nê hemkaran danê ke wa cade nê kerdişan ra fek vera bidê.'' 

Wekîlê HDPyî Musa Pîrogluyî zî pare kerd ke vera ziwan, bawerî û kulturê Dêrsimî dişmenîye yena kerdene û vat: ''Ma Seyîd Rizayî ra nata çok nêşîyê erdî ro û ma do nêşorê. Ê do nêeşkê bawerîya Dêrsimî biqedînê. Ma do vera nînan têkoşînê xo berz bikerê.''