Dêrsim de vizêr serê sibayî wendekarêka unîversîte ya ke semedê xebate şîye klînigê didanan hetê Hekîmê Didanan Mehmet Demirbaşî ra raştê tacîzê fekî û fîzîkîyî ameye.

Endamanê Meclîsê Wendekaranê Demokratîkan Kuçeyê Hunerî de vera nê tacîzî eşkerayîya çapemenîye daye. Rêxistina HDPyî ya Dêrsimî zî paştî daye ci. Eşkerayîye de ame vatene ke wendekarêka unîversîte ya ke semedê xebate şîye klînigê didanan hetê Hekîmê Didanan Mehmet Demirbaşî ra raştê tacîzê fekî û fîzîkîyî ameye. Wendekaran bale ante zêdîbîyayîşê tacîz û hêrişê vera cinîyan ser û vat emser pê bi teklîfanê burs û hetkarîya madî wendekaran rê teklîfê bêehlaqî yenê kerdene. Cinîyan waşt ve tacîzkarî bêrê cezakerdene û vat ê do tim tacîzkaran eşkera bikerî û vera hêrişan bêveng memanê.