Dêrsim de wendekaranê Zanîngehê Munzurî semedo ke bale biancê meseleya cayê mendişî ser  Meydanê Seyîd Rizayî de vizêr eşkerayîyêke daye. 

Ciwanan pare kerd ke xeylêk wendekarî nêeşkayî keye kîra bikerê yan zî wargehan de ca bibê û teber de mendî. Ciwanan vat: ''250 wendekaran nê semedî ra keydê xo vindarnayî. Îdareyê wargehan wendekaran rê pê tebereştişî gef wanenê. Yew cil de 2 wendekarî manenê, odaya çar kesan de 10 tenî manenê. Dewleta ke heqê cayê mendişî nêdana wendekaran ça de ya? Dewlete bi nê hawayî sûc kena, heqê perwerdeyî binpay kena. Ganî mexdûrîyetê wendekaran bêro çareserkerdene.''

6 wendekarê cinîyî ameyî teberkerdene 

Dima saetanê şanî de Wargehê Wendekaran ê Cinîyan ra 6 wendekarî ameyî vetene. Wendekarî semedo ke na rewşe protesto bikerê verê wargehî de ameyî pêser. Ciwanan pê sloganan kerdişê wargehî protesto kerd.

Semedo ke hûmara wendekaran zêdîyaye polîsî sewqê verê wargehî ameyî kerdene. Dima Walîyê Dêrsimî Mehmet Alî Ozkan zî şi hetê wendekaran.  Ozkanî îdîa kerd ke wendekarêk zî teber de nêmeno. La wendekaran vat ke ê pêro hê teber de yê.

Ozkan dima şi zereyê wargehî. Wendekaran pê sloganê 'vejîyo teber' walî protesto kerd.  

Wendekarê Wargehê Camêrdan zî semedê paştdayîşê wendekaran ê cinîyan ver bi Wargehê Cinîyan şîyî. Ciwanan çalakîya rayraşîyayîşî de sloganî vatî, çepikî dayî piro û tîlîlî kerdî. Hemwelatîyan zî şûmşîn û kuçeyan ra paştî daye wendekaran. Ciwanî çalakîyan roniştişî ra dima 03.30 de şewe çalakîya xo qedînaye.

Polîsan kerd ke rojnamgerê ke çalakîye teqîb kerdêne asteng bikerê.