Dêrsim de Meydanê Sehîd Rizayî de Newroze ameye pîrozkerdene. Şaro ke Kuçeyê Sanatî ame têhet heta warê Newrozî rayraşîyîş kerd. Şayîye de  sloganê"Jin, jiyan, azadî" û "Bijî Serok Apo” ameyî vatene. Polîsan waşt kincanê netewîyan rê asteng bê la ciwanan nêrazîbîyayîş mojna û pa kincanê xo ya kewtê warê şayîye.

Hemsereka DEM Partî ya Dêrsimî Humeyra Yegin Newroze pîroz kerd. Hemşaredaran ê Dêrsimî Bîrsene Orhan û Cevdet Konakî vera qeyûman hêrsê xo ard ziwan û semede xurtkerdişê têkoşînê hemparî veng da.

Serekê Pêroyî yê EMEPî  Seyit Aslanî zî vera destbendkerdişê Ekrem Îmamogulî hêrsê xo ard ziwan û vat, "Ma do pêro pîya vera nê îqtîdarê zalîmî têkoşîn bikerê û ser bikewê. "

Vervatoxê Dewrî yê Federasyonê Meclîsan ê Sosyalîstan Mahir Gurzî zî semedê xurtkerdişê têkoşînî veng da.

ESPyî ra Orhan Çelebî zî nê vatî: "Îqtîdar vera heme muxalîfan hêrişo topyekun dayo destpêkerdene. Semedê wayîrvejîyayîşê destkewteyanê kurdan û ardişê haştîye gerek ma pêro paştî bide vengdayîşê Birêz Ocalanî. "

Wekîla DEM Partî Burcugule Çubuk zî Dêrsim sey sembole têkoşînê haştîye name kerd û vat, "Eke ewro qala haştîye yena kerdene no xeyrê têkoşînê ma yo."

Wekîla DEM Partî yê Dêrsimî Aytene Kordu zî wina vat:"Ma torê Seyîd Riza û hemrayanê ci yê.Ma do tim erjanê xo bipawê. Şarê Dêrsimî tim azadîye û edalet wazeno.Ewro ra tepîya zî têkoşînê ma do dewam bikero."

Badê tafînayîşê adirê Newroze hunermedan Quartet, Kadir Çat û Cevdet Bagcayî deyîrî vatî.