Unîversîteya Munzurî ya Dêrsimî de Camîya Hz. Alîyî, Merkezê Ciwanan ê  Hz. Alî û Hz. Fatma û Kursê Quranî yê Ehl-i Beytî  ameyî akerdene. Serekê Karanê Dîyanetî Alî Erbaş pîya bi Walîyê Tuncelî Mehmet Alî Ozkan û Serşewirmendê Serekkomarî Îsmaîl Kişla tewrê akerdişî bîyî.

Hêzanê Demokrasî  û Kede yê Dêrsimî verê cemxaneyî de eşkerayîye daye û vera polîtîkayanê asîmîlasyonî yê vera bawerîyan nêrazîbîyayîş mojna.

Serekê Şubeyê Dêrsimî yê Komeleya Kulturî ya Pîr Sultan Abdalî (PSAKD) Ekber Kayayî eşkerayîye wende. Kayayî ard ziwan ke bawerîya elewîtîye xeylêk wexto polîtîkayanê asîmîlasyonî dir rî bi rî ya û vat: ''Verê ma de yew zîhnîyet est o ke jaranê şarî çîn hesibneno, koyan şîrketanê madenî rê akeno, Duzgun Baba de pê çekan fotograf vejeno. Zîhnîyeto ke cemxaneyan sey merkezê bawerîye qebul nêkeno, ma red kenê. Zîhnîyeto ke dewanê elewîyan de camî virazeno, domananê dêrsimijan îmam xatîban rê mecbur verdeno û kerrayanê mezelan şikneno do çiwext bibedilîyo? Key do bêro famkerdene ke bi nê rayîr û metodan serkewtiş nêbeno?