Serekê Karanê Dîyanetî yê Tirkîya Alî Erbaş şibi Dêrsim û verê Cemxaneyê Tuncelî yê walî Mehmet Alî Ozkan, Serekê AKPyî Sercan Ozaydin, serekê cemxaneyî Alî Ekber Yurt û muftuyê Dêrsimî reyde fotografê xo girewtbi.

Wekîlê HDPyî yê Dêrsimî Alîcan Onluyî hesabê xo yê medyaya dîjîtale de vera fotografê Erbaşî nêrazîbîyayîşê xo mojna û vat: ''No fotograf, fotogragê asîmîlasyon û înkarî yo.''

Onluyî bi serrnameyê 'Fotografê ê kesanê ke eslê xo vînî kerdo' hesabê xo de wina vat: ''Aysele Dogan wesîyetê xo de vatbi ke 'Cemxaneyê Tuncelî hînî yew merkezê bawerîye nîyo. Mi meberê uca.' No fotograf wesîyetê Aysele Dogan keno heq. No fotograf fotografê înkar û asîmîlasyonî yo. Serekê Karanê Asîmîlasyonî, walîyo ke sey serekê AKPyî têgêreno, pîrê ke bawerîya ma herimnenê nê fotografî de pîya yê. Heta ke no cemxane nê kesan ra nêxelisîyo ez do nêşira ci. Seba ney ganî ma sey şarê Dêrsimî pîya têkoşîn bikerê.''