Heyetêkê Komîsyonê Zîndanan ê OHDyî Zîndanê Cinîyan ê Bakirkoyî de îşkenceyî ser o pêvînayîşî kerdî. Avûkate Eda Onala ke mîyanê heyetî de cagirewtêne ANFyî rê qala rewşa zîndanî kerde.

Eda Onal vist vîrî ke înan waştişê keyeyan ser o zîndan zîyaret kerdo. Avûkate Onale pare kerd kerd ke bi taybetî wextê pandemî ra nata heqê dermankerdişî, sewqê nêweşxaneyî yê tepişteyan nênê caardene. Onale vat: ''Tepişteyî nênê berdene bi nêweşxaneyan. Hemşîreyî yenê koxûşan, muayene kenê. Hetê bînî ra waştişê tepişteyanê nêweşanê giranan zî nênê caardene, seba tedawî şertî nênê caardene û coka rewşa înan zî bena giranêr.''

Onale da zanayene ke bi taybetî hewteyanê peyênan de koxûşan de cigêrayîş zêdîyayo û vurîyayo tacîzî. Onale vat: ''Tepişteyan vat ke hûmaritişî ra dima gardîyanî bi keyfî ê derbazê odayan benê, malzemeyanê pakîye yê tepişteyan gênê ke nê malzemeyî tepişteyan kantînî ra bi pereyê xo girewto. Ê bi bahaneya ke malzemeyî zêde yê, dest nanê înan ser.''

Onale îfade kerd ke zîndan de werd nêvejîyeno tepişteyan rê û bi hawayêkê keyfîyî werd yeno sînorkerdene. Onale vat: ''Zîndan de tewr zaf 30 deqayan destûrê pêvînayîşî dîyeno. Naye ra ber zî cinîyê tepişteyî raştê gefê rapor û dîsîplînî yenê.''