Tepişteyo sîyasî Vedar Çem Erkmen Zîndanê Tekîrdagî de bi bahaneya 'asayîşê ci yê cuye çin o' hucreyê yewkesî de amebi tecrîdkerdene û bi hawayêkê şikdarî heman hucreyî de dinyaya xo bedilnabi.

Otosîya verêne ya Erkmenî bê avûkatan û keyeyî ame kerdene û avûkatê ke waştêne serebût roşnî bikerê ameyî astengkerdene.

Avûkatanê Erkmenî ra û Endama Komeleya Huqûqnasanê Seba Azadîye (OHD) Destîne Yildiz derheqê babete de ANFyî rê qisey kerd.

Destîna Yildiz îfade kerd ke Erkmen merdimêko winasên nêbi ke xo bikişo û vat: ''Erkmen 16ê kanûne de hucreyê hîrêkesan ra ame berdene bi hucreyê yewkesî.  Ci rê ame vatene ke 'asayîşê ganê ci çin o.' La Erkmenî qetî nêwaşt hucreyê ci bêro vurnayene. Dosya de nuseno ke îstîxbaratê cendirmeyan vato 'asayîşê ganê ci çin o. La delîlêko musbet nêameyo mojnayene. 16ê kanûne de hucreyê ci ame vurnayene û 19ê kanûne de zî ey dinyaya xo bedilnaye. Her çiqas îdareyî îdîa kerd ke ey xo kişto embazanê ci yê hucreyî zî vatêne no întîhar nîyo. Înan zî vatêne ke meylê ci yê xokiştişî çinbi. Ey serebûtî ra di rojî verî keyeyê xo de qisey kerd û vat ke wa gerreyê îdareyê zîndanî bikero ke o pê zorî eşto hucreyê yewkesî. Îdîaya xokiştişî ya Erkmeno ke keyeyê xo rê waştbi gerre bikero, şikdar o.''

Destîna Yildiz da zanayene ke normal nîyo ke mengêke de 7 kesan zîndanan de dinyaya xo bedilnaya û vist vîrî ke zîndanan de tepişteyanê nêweşan rê merg yeno ferzkerdene.

Destîna Yildiz vat: ''Wa rayaumûmîye na babete de zêdêr hîsger biba. Na rewşe beno ke kerdişêko newe bo. Tepişteyê nêweşî nênê dermankerdene, îdîa kenê ke merdimî xo kişenê. No prosesêko normal nîyo. Bi taybetî janî ra dima zîndanan de kerdişê keyfî zêdîyayî, binpaykerdişê heqanê merdiman giran bîyî.''