Taxa Çelebîbagiyî ya qezaya Erdîşî ya Wanî de, 8ê nîsana 2016î de tîmanê taybetan ê cendirmeyan (POH) û polîsanê hêzanê taybetan (POH) bi îdîaya ke 'gerîlayî uca de yê' eştbi keyeyê Ahmet Atamanî ser. Hêzanê tirkan keye vêşnabi. Şewat de Hedîye Ataman dinyaya xo bedilnaye û Ahmet Ataman zî bi îşkence tepişîya.

Dayîreyê Ceza yê Hîrêyînî yê Mehkemeya Berze goş nêda bira binpaykerdişê heqî yê Mehkemeya Qanûnê Bingeyîyî (AYM) ke AYMyî vatbi ke keyeyî rê îşkence ameyo kerdene.

Avûkatê keyeyî Mahmut Kaçanî muracatê Serdozgerîya Komare ya Erdîşî kerdbi. La Serdozgerîye bire daye ke babete nêra teqîbkerdene û serebût de qusirê polîsan çin bîyo. Kaçanî vera na bire zî îtiraz kerd. Mehkemeya Ceza ya Sulhe ya Erdîşî îtîraz ercna û vat ke polîsan de qusir çin o. Naye ser o avûkatanê keyeyê Atamanî 6ê adara 2019î de muracatê AYMyî kerd.

AYMyî hukm da ke heqê cuya Hedîye Ataman ameyo binpaykerdene.

Hetê bînî ra roniştişê 9ê nîsana 2018î de derheqê mêrdeyê Hedîye Ataman Ahmet Atamanî de cezaya zîndanî ya 18 serran û 4 mengan dîyaye. Avûkatan na bire zî berde verê Mehkemeya Îstînafî ya Herême ya Erziromî la Dayîreyê Ceza yê Şeşinî yê Mehkemeya Edlîye ya Erziromî îtîraz red kerd.

Naye ser o bire ameye berdene bi Mehkemeya Berze. Dayîreyê Ceza yê Mehkemeya Berze bi îdîaya ke 'Ahmet Atamanî yewparetîya dewlete xera kerda' bire daye ke cezaya muebede bêra dayene ci. AYMyî ancî bire daye ke heqê cuye ameyo binpaykerdene û îşkenceyê Atamanî ameyo kerdene.

Prosesê temyîzî dest pêkerd. Serdozgerîya Komare ya Mehkemeya Berze derheqê xerakerdişê ceza de fikrê xo pêşkêşê Dayîreyê Mehkemeya Berze kerd. La Dayîreyê Ceza yê Mehkemeya Berze cezaya zîndanî tesdîq kerde.

Avûkatê Atamanî Mahmut Kaçanî derheqê babete de eşkerayîye daye û vat: ''Dayîreyê Ceza yê Hîrêyînî yê Mehkemeya Berze verî ke sebebanê temyîzî biercno, bire daye û cezaya zîndanî tesdîq kerde. Bi nê hawayî ceza ameye cezakerdene; ma seba muwekîlê xo ancî muracatê AYMyî kerd.''