Berkîn Elvan wextê xoverdayîşê Gezî de amebi qetilkerdene.

Roniştişo 18. yê dewaya Berkîn Elvanî Mehkemeya Cezaya Girane ya 17. de ame kerdene. Akademîsyenê Haştîye û Mayê Şemeyî zî seba teqîbê roniştişî şîyî edlîye. Semedê korona ra tay kesî gêrîyayî salona mehkeme.

Polîso verguman Fatîh Dalgali Wanî ra bi rayîrê SEGBÎSî tewrê mehkeme bi. Seba ke dozger pê Korona kewto roniştiş de mutala nêame kerdene. Roniştiş taloqê 29ê çeleyê 2021î bi.

Avûkatê keyuyê Elvanî Can Atalayî verê edlîyeyî de qisey kerd û pare kerd ke îqtîdar destpêkî ra nata mudaxeleyê dosya keno. Atalayî vat: ''Domano 14 serre verê çiman de kişîya. Wa mesuldarî hesabê naye bidê.''

Babî û dadîya Berkîn Elvanî Samî û Gulsume Elvan zî îfade kerd ke ê 7 serrî yo pabeyê edaletî yê û waşt ke mesuldarî bêrê hukmkerdene.