Faşîstê bi nameyê Onur Gencero ke dewleta tirke paştî dayêne ci bînaya HDPyî ya Îzmîrî de Denîze Poyraz qetil kerdbî. Roniştişo dewaya vera kiştox Gencerî Mehkemeya Cezaya Girane ya Îzmîrî de ame kerdene. Roniştişê dewa ra verî HDPyî eşkerayîyêke daye.

Vervatoxa HDPyî Ebru Gunay, wekîlê HDPyî Mûrat Çepnî, Oya Ersoy, Serpîl Kemalbay, Wekîlê CHPyî Sezgîn Tanrikulu û Serekê Weqfa Haştîye Hakan Tahmaz zî tede xeylêk kesî tewrê eşkerayîye bîyî.

Vervatoxa HDPyî Gunaye tîya de qisey kerd û da zanayene ke roja verêne ra nata kiştox pawîyeno. Gunaye vat: ''Nê dewayanê kişîyayîşê kurdan de ma tewirê mehkeme hol zanenê. Mehkemeyî pê cezanêdayîşî kiştoxan pawenê. Têkoşînê cinîyan do kiştoxan ra hesab bipersê. Eke kiştoxê Denîze biameyêne eşkerakerdene û tedbîrê hewceyî biameyêne girewtene embaze Nagîhane do nêameyêne kiştene. No îqtîdar têkoşînê cinîyan ra terseno. Hişmendîya ke Jîna Emînî qetil kerdbî Nagîhane Akarsel û Denîze Poyraz qetil kerde. La bizanê ke kiştoxî do hesab bidê. Xoverdayîş û têkoşînê ma do bikero ke dişmen hesab bido.''