Goreyê xebera Deutsche Welle'nin (DW) dewaya ke Rayberê Şarê Kurdî bi rayîrê avûkatanê xo vera Yunanîstanî akerdbî, ameya qebulkerdene. Muracatê dewa de ame îfadekerdene ke wextê prosesê Komployê 9ê Teşrîna Verêne ya 1998î de kerdişê Yunanîstanî yê vera Ocalanî goreyê Peymana Heqanê Merdiman a Ewropa (PHME) nîyê. Muracat de ame vatene ke goreyê PHME nîyo ke Abdullah Ocalan teslîmê Tirkîya ameyo kerdene, Yunanîstanî muracatê bextwaştişî nêercnayo, Yunanîstan de Rayberê Şarê Kurdî bi hawayêkê îlegalî tepişîyayo û mehkemeyanê Yunanîstanî nêverdayo ke Rayberê Şarê Kurdî bigêro heqanê xo.

Muracatê akerdişê dewa de ame parekerdene ke wexto ke Rayberê Şarê Kurdî Yunanîstan de mendêne (Meydanê Teyarayan ê 9ê Teşrîna Verêne yê 1998î, 29ê Çeleyî-2yê Sibata 1999î Girawa Korfuyî, 2-15ê Sibata 1999î Sersefîrîya Yunanîstanî ya Kenya) PHME ameyo binpaykerdene.

Naye ra ver zî 4ê kanûna 2008î de Rayberê Şarê Kurdî muracatê Mehkemeya Îdarî ya Atina kerdbi û îfade kerdbi ke kesê ke di reyî sba bextwaştişî muracat kenê goreyê qanûnan ganî apey nêerşawîyê. La no muracatê akerdişê dewa 30ê çeleyê 2017î de hetê Mehkemeya Îdarî ya Atina ra amebi redkerdene.

MHME nika muracatê akerdişê dewaya vera Yunanîstanî qebul kerd û hukmatê Yunanîstanî û avûkatanê Ocalanî ra zî randevuya pêvînayîşî waşte. Mehkeme hukmatê Yunanîstanî ra pers kerd ke 'Abdullah Ocalan hetê ajananê yunanan ra teslîmê dewleta tirke ameyo kerdene yan nê?' Hukmatê Yunanîstanî ganî mîyanê 12 hewteyan de cewab bido persî. Wina pawîyeno ke MHME serrnê do dewa ser o bire bido. Beno ke mehkeme nê prosesî de roniştişêk zî serûber bikera.

Rayberê Şarê Kurdî verî zî vera Tirkîya muracatê akerdişê dewa kerdbî. Avûkatanê Ocalanî prosesê ê çaxî de seba ke 'cuya ey binê tehlukeyî de ya, ey muameleya xirabe dîya û bi edîlî do nêro muhakemekerdene' muracatê mehkemeya Strasbourgî kerdbi. Dima CPTyî adara 1999î de reya verêne Îmrali zîyaret kerdbi û raporê xo de vatbi ke 'Ocalan îşkence yan zî muamelayêka xirabe nêvîneno.'

La mehkemeya Strasbourgî ya pabesteyê MHME 12ê adara 2003yî de dabi zanayene ke Abdullah Ocalanî muamelaya xirabe dîya û heqê ci ameyê binpaykerdene.

Dewaya diyîne ya Abdullah Ocalanî ya vera Tirkîya (Ocalan-2) zî 2014 de qedîyabî. Mehkeme bira xo de îdîa kerdbi ke 2009 ra dima binpaykerdişê heqî nêqewimîyayo. MHME dima bire daye ke 'heqê hêvîye' yê Ocalanî ameyo binpaykerdene.