Mehkemeya Heqanê Merdiman a Ewropa 18ê adara 2014î de derheqê muracatê 2003yî yê avûkatanê Rayberê Şarê Kurdî Abdullah Ocalanî de bire dabî û vatbi ke cezaya muebede ya girankerdene ya vera Ocalanî dûştê Peymana Heqanê Merdiman a Ewropa (PHME) ya.Rixmê na bira ke sey 'Ocalan 2' pênase bena, Tirkîya gamêke nêeştbî. Naye ser o Komîteya Wezîyan a Konseya Ewropa seba ke Tirkîya çarçewa 'heqê hêvîye' de qanûnan viraza derheqê ci de prosesêkê ercnayîşî dabi destpêkerdene. Buroyê Huqûqî yê Asrinî zî seba ke bira MHME nêmeya caardene 9ê tebaxa 2022yî de reyna muracatê Komîteya Wezîran a Konseya Ewropa kerdbi.

Muracat de bale ameye antene ser ke Abdullah Ocalan bê 'heqê hêvî' zîndan de tepişîyeno û xîretê huqûqî yê seba veradîyayîşê ey ameyî redkerdene. Muracat de ame pêşnîyazkerdene ke seba çareserîya mesele yaa bingeyê bira MHME ganî Tirkîya qanûnan de vurîyayîşan bikera. Muracat de ame dîyarkerdene ke Tirkîya babeta vengdayîşê caardişê bire û pêşnîyazanê Komîte yê 3ê kanûna 2021î de gamê musbetî nêeştê û waştişî ameyî rêzkerdene.

Tirkîya cewabê muracato ke Buroyê Huqûqî yê Asrinî seba Rayberê Şarê Kurdî dabi, da. Tirkîya îtîraf kerd ke Rayberê Şarê Kurdî 'heqê hêvî' ra muaf kerdo û vat: ''Mumkîn o ke mehkumê bi cezaya muebede ya girankerde vera bidîyê la bi taybetî tay sûcî ney ra muaf ameyî girewtene.''

Tirkîya cewabê xo yê verênî dibare kerdî û qala Planê Çalakîye ya ke 1ê teşrîna verêne ya 2021î de pêşkêş kerdbi, kerde. Cewab de dîyar kerd ke Planê Çalakîye babetê ke muracat de ca gênê hetê avûkatan ra bi hîrayî ameyî qalkerdene.

Muracatî ra dima Komîte 3yê kanûne de bira xo eşkera kerdbî. Komîte dewaya hûmara kesan bira 'Ocalan-2' de cezaya muebede ya nêna kêmkerdene û cigêrayîşê înan waştbi. Komîte venga Tirkîya dabi ke tewr erey êlule de nê warî de averşîyayîşan biresnê. Rixmo ke wextê Tirkîya qedîya dewleta tirke de derheqê hûmara kesanê cezaya muebede girewte de ne zî derheqê 'heqê hêvî' de heta nika gamêka pozîtîfe nêeşta.