Tepişte Tahîr Gurdal (53) zîndan pê nêweşîya kanserî kewt û 19 rojî Nêweşxaneyê Perwerde û Cigêrayîşî yê Gazî Yaşargîlî  de pê kelemçeyan ame tepiştene. Gurdalo ke cezaya ci ameye peydeeştene, 13 rojî dima dinyaya xo bedilnaye.

Tepişte Gurdal rixmê nêweşîya xo ya girane 10 serrî yo Zîndanê Tîpê Fyî yê Wanî de ameyêne tepiştene û dima ra semedê tedawîyî sewqê Zîndanê Amedî bi. Gurdalo ke bi rojan pê kelemçeyan nêweşxane de mend, 28ê teşrîna peyêne de cezaya ci ameye peydeeştene û ame veradayene.

Gama ke Gurdal nêweşxane de bi lajê ci Bîrhat Gurdalî ke Ajansê Mezopotamya rê qisey kerd vat: “Babîyê mi verî nêweş nêbi. Bado ke kewt zîndan nêweş kewt. Şertê zîndanî goreyê mehkuman nîyê. Eke rewna agêro zîndan do tewr zaf 15-20 rojî biciwîyo."