Temsîlkarê dezgehanê elewîyan vera bira Erdoganî ya seba veradayîşê hukmdarê Qirkerdişê Sêwazî verê Wezaretê Edaletî de ameyî têhet. Eşkerayîye de ame vatene ke AKP Qirkerdişê Sêwazî keno meşrû ke ma reyna bêrê tafînayene.
Serra 1993î de Qirkerdişê Sêwazî de Otêla Madimakî de 35 roşnvîrî, nuştoxî, hunermendî ameybî vêşnayene. Hukmdaranê Qirkerdişê Sêwazî ra Ahmet Turan Kiliçî bi bahaneyê nêweşîye bi bira Serekkomarê Tirkîya Recep Tayyîp Erdoganî amebi veradayene. Dezgehanê elewîyan vera veradayîşê hukmdarê Qirkerdişê Sêwazî nêrazîbîyayîşê xo mojna.
Temsîlkarê dezgehanê elewîyan ê ke verê Wezaretê Edaletî de ameyî têhet, polîsan mudaxaleyê înan kerd û destûrê çalakîye nêda. Temsîlkaranê elewîyan verê merkezê Komeleya Kulturî ya Pîr Sultan Abdalî (PSKD) de eşkerayîye daye. Bi seyan kesî tewrê çalakîye bîyî.
Eşkerayîye de ame vîrardene ke Ahmet Turan Kiliçî Sêwaz de 35 kesî vêşnayî û ame vatene ke zîndanan de bi seyan tepişteyê nêweşî estî qey ê nînê veradayene la qetilkarê 35 kesan yeno veradayene. Qiseykerdişan nê ameyî vatene: ‘‘No qerar yeno no mana ke yeno waştene ke ameyoxê ma newe ra bêro tafînayene. Heta ke no qerar pêser nêro antene ma do tim kuçeyan de bê. Nê îqtîdarî qetilkarê Sêwazî kerdî muşrû. Naye ma pêroyî zanê. Înan ke xora Sêwas vêşna ronayoxê AKPyî yê. Qetilkaranê ke ganê ma vêşnayî kesêk nêeşkeno înan efû bikero. Ma na neheqîye qebul nêke. Ma do vera na bêhuqûqîye çalakîyan rê dewam bikerê.‘‘
