Serra 1993î de Qirkerdişê Sêwazî de Otêla Madimakî de 35 roşnvîrî, nuştoxî, hunermendî ameybî vêşnayene. Hukmdaranê Qirkerdişê Sêwazî ra Ahmet Turan Kiliçî bi bahaneyê nêweşîye bi bira Serekkomarê Tirkîya Recep Tayyîp Erdoganî ra ame veradayene. Dezgehanê elewîyan vera veradayîşê hukmdarê Qirkerdişê Sêwazî nêrazîbîyayîşê xo mojna. Dezgeh û rêxistinê elewîyî roja yewşemeyî do verê Wezaretê Edaletî de bêrê pêser û bi girseyan bira Erdoganî protesto bikerê.

Serekê Pêroyî yê Komeleya Kulturî ya Pîr Sultan Abdalî (PSKD) Ganî Kaplanî da zanayene ke selahîyetê efû yê serekkomarî esto la Erdogan bi serran o ke no selahîyet seba tepişteyanê nêweşan nêxebitno. Kaplanî vat: ''Hukmdarê Qirkerdişê Sêwazî bîyî şaredar, wezîfeyê taybetî ameyî dayene înan. Qirkerdişê Sêwazî ra dima zaf îqtîdarî ameyî û şîyî la înan ra yew zî qirkerdiş bi hawayêkê temamî dam nêkerd. Ma vera veradayîşê Kiliçî yê. Eke Erdogan samîmî yo ganî ê tepişteyê nêweşî yê bînî zî wa bêrê veradayene. Zîndanan ra her orje tebutî yenê la hukmdarêkê qirkerdişêk yeno veradayene û no merdim rojnameyan de sey 'bêsuc' yeno mojnayene. Na rewşe ma zaf qehirnayî. Ma venga sosyalîstan, wayîrê wijdanan û her kesî danê ke roja şemeyî saate 14:00 de Guvenparkî de tewrê çalakîya ma bibê.''

Hetkarê Serekê Pêroyî yê Federasyonê Sazgehanê Elewî-Bektaşîyan (ABF) Muslum Metînî vat: ''Madimak de şaîrê ma, ozanê ma, roşnvîrê ma û Pîr Sultan Abdal newe ra ameybî vêşnayene. Kam nê sucdarî efû keno wa bikero la ma do ey qet efû nêkero. Na bire elewîyî şeqiznayî û birêka sîyasî ya. Veradayîşê Kiliçî seba ma sey serebûtê Kerbela yo.''

Hemserekê Şubeyê Anqara yê Komeleya Elewîyan a Demokratîke (DAD) Mustafa Karabudakî vat: ''Madimak seba ma travma yo.27 serr ê ke seba ke Qirkerdişê Sêwazî bêro roşnkerdene gamêke nêameye eştene. Na bire polîtîk a eke wina nîya ganî pêro tepişteyê nêweşî bêrê veradayene. Qirkeranê Sêwazî hema hesab nêda şar. No mêrik o ke dîmenanê Qirkerdişê Sêwazî de tewr vernî de aseno ganî nêameyêne efûkerdene. Ma do roja şemeyî vera na bire nêrazîbîyayîşê xo bi hawayêkê girseyî bimojnê.''

Pîrê Cemxaneyê Huseyîn Gazî Huseyîn Ozî zî vat: ''Ganî ma sey komelê elewîyan nêrazîbîyayîşê xo bimojno. Aqlê dewlete bi veradayîşê nê mêrikî mesajêk dano, provakasyon keno.''