Federasyonê Elewîyanê Bektaşîyan (ABF), Komeleya Kulturî yê Pîr Sultan Abdalî (PSAKD), Federasyonê Komeleyanê Elewîyan (ADFE), Weqfa Kulturê Anadoluyî ya Haci Bektaşî Velîyî (HBVAVK), Komeleyanê Kulturê Elewîyan (AKD), Federasyonê Weqfanê Elewîyan (AVF), Komeleyanê Elewîyanê Demokratîkan (DAD) û Konfederasyonê Yewîya Elewîyanê Ewropa (AABK) seba yadkerdişê qurbananê Qirkerdişê Mereşî merasîmêk kerd. Wekîlê HDPyî Mahmut Togrul, Wekîlê CHPyî Orhan Saribal û temsîlkarê partîyanê bînan zî beşdarê merasîmî bîyî.

Girse ver bi cayê qirkerdişî taxa Yoruk Selîmî ya Mereşî şi. Tîya de polîsan xîret kerd ke girse asteng bikerê la girse resa cayê qirkerdişî û rêz girewt.

Wekîl Togrulî tîya de qisey kerd û ard ziwan ke serrgêra 44. ya Qirkerdişê Mereşî de zî hêzê ke peyê qirkerdişî de yê nêameyê roşnîkerdene. Wekîlê CHPyî Saribalî zî îfade kerd ke ganî belgeyê serê qirkerdişî bêrê eşkerakerdene.

Serekê AABFyî Huseyîn Matî zî pare kerd ke heta ke qirkerdişî ra hesab nêro persayene dejê înan nêkêmîyeno. Serekê AKDyî Îsmet Kurtî zî nameyê dezgehanê elewîyan ser o eşkerayîya hempare wende û da zanayene ke elewîyî hêma zî raştê cîyakerîye yenê û waşt ke dewlete nê qirkerdişî de têrî bêra.

Qiseykerdişan ra dima lawikî ameyî vatene, loqmayî ameyî vilakerdene. Dima girse şi Goristanê dewa Yolboyuyî û qurbanê Qirkerdişê Mereşî yad kerdî.