Komeleya Rojnamegeran a Dîcle Firatî (DFG)  raporê 'binpaykerdişê heqanê rojnamegeran' ê teşrîna verêne eşkera kerd. Eşkerayîye de ame vatene ke seba ke xebera di sivîlanê ke helîkopterî ra erzîyayî war kerde muxabîrê Ajansê Mezopotamya Adnan Bîlen û Cemîl Ugur, muxabîra Jinnews Şehrîbane Abî û Nazan Sala seba girewtişê qesasî ameyî destbendkerdene û tepiştene.

Eşkerayîya DFGyî de ame parekerdene ke rojnamegerî bi sûcdarîyanê bêbingeyan ameyî tepiştene û seba veradayîşê rojnamegeran ê tepişteyan veng ame dayene.

Raporê DFGyî de nê zanayîşî dîyayî: ''Menga teşrîna verêne de 11 rojnamegerî ameyî destbendkerdene, 4 rojnamegerî ameyî tepiştene, 4 rojnamegeran rê gef ame wendene, 3 rojnamegerî wexto ke xebere teqîb kerdêne ameyî astengkerdene, 2 rojnamegerî kewtî verê tehqîqatî, 5 rojnamegeran rê dewa ameye akerdene, 5 rojnamegeran rê cezaya zîndanî ya 7 serran û 11 mengdan dîyaye û cezaya pereyî ya qasê 3 hezar û 650 TL dîyaye, 91 rojnamegerî 47 dosyayan rê ameyî hukmkerdene û 91 rojnamegerî hema zî tepişte yê.''