Bi wesîleya serrgêra Komployê 9ê Teşrîna Verêne ya vera Rayberê Şarê Kurdî Abdullah Ocalanî rêxistina HDPyî ya Çewlîgî de panel ame kerdene. Avûkatê Abdullah Ocalanî Mazlûm Dînç tewrê panelî bi û derheqê komplo û tecrîdê Îmraliyî de qisey kerd.

Dînçî vat: ‘’No komplo zaf hetin o. Sere de Amerîka hêzê serdestê ke wazenê Rojhelatê Mîyanênî de şerî xorî bikerî Birêz Ocalan hedef girewt, coka o mecbur mend ke Sûrîye ra vejîyo. Birêz Ocalan seba ke meseleya kurdan bi rayîranê demokratîkan çareser bikero şi Ewropa la gama ke payna erdê Ewropa fam kerd ke vera ey komployêk est o. Nê welatan huqûqê xo nêard ca.  Waştişê îltîca ê Ocalanî nêame caardene. Dima Rûsya zî eynî çî kerd.  298 wekîlan semedê heqê îltîcayê Birêz Ocalanî muracat ker la dewletan semedê menfeatê xo destûr nêda. Yûnanîstanî ra şawîya Kenya û dima ra 15ê sibatê de Yunanîstan de pê komployê mîyanneteweyîyî ame esîrgirewtene.’’

Mazlûm Dînçî wina dewam kerd: ‘’Îmrali de yew sîstem ame înşakerdene. Hêver ûca zîndano akerde bi, dima ra ame vegkerdene û goreyê Birêz Ocalanî ame dîzaynkerdene. Wina qeyde sîstemê îşkenceyî ame averberdene. Hukmkerdiş bi hewayêkê formalîte ame kerdene. Rixmo ke dosya 17 hezar pelî bî aşmêke de qedîyaye. Zelal esayêne ke no qerarêko sîyasî bi. Dima ra 29ê hezîrane de qerarê îdamî dîya ke no tarîx tesaduf nêbi. Tarîxê îdamkerdişê Sêx Seîdî amebi vîjnayene ke mesajêk bibîyo kurdan.’’

Dînçî vat: ‘’12 serrî pêvînayîşê avûkatan yenê astengkerdene. Reyna destûrê pêvînayîşanê keyeyan zî nêdîyeno. Birêz Ocalan û hîrê tepişteyê bînî bine tecrîdî de yenê tepiştene. Badê qeldîyayîşê masa, 2015î ra nata tecrîd ame xorîkerdene.  Ma xeylêk rey muracatê CPTyî kerd la bêveng manenê. CPTyî wextê kilmî de vat înan Îmrali zîyaret kerdo. Yew tepişte têna 15 rojî eşkeno hucre de bimano la Birêz Ocalan 24 serrî yo binê tecrîdî de yo. Nê tespîtî hetê CPTyî ra zî ameyî kerdene. La ne CPT ne zî dewlete wezîfeyê xo anê ca. Birêz Ocalanî bi têkoşînê xo yê Îmraliyî komplo pûç vet. Rixmê şertanê zehmetan fîkrê xo resnayî teberi.  Qanûnê cezaya zîndanî ya heta mergî têna semedê Birêz Ocalanî ame vetene. Na ceza îdamî ra wetêr bî. No îşkence yo.  Mehkemeya Heqanê Merdiman ê Ewropa (MHME) Tirkîya ra waşt  na babete de wa peyser game bierzo la Tirkîya hema zî nê qerarî ana ca. MHME ganî şiro Tirkîya ser ke wa goreyê qanûnî têbigêro.’’

Mazlûm Dînçî qiseykeridşê xo wina qedîna: ‘’Dezgehê mîyannateweyîyî semedê menfeatanê xo bêveng manenê. Ma verî zî dî gama ke pêvînayîşê bi Abdullah Ocalanî benê komel de hêvî yena afernayene. Seba ke fîkranê Birêz Ocalanî ra tersenê  verê ey genê. Eke verê ci bêro akerdene meseleya kurdan yena çareserkerdene û haştîye yena welatî. Têna kurdî nê ganî heme şarê dinya semedê şiknayîşê tecrîdî têbigêrê. Eke ma azadîye û haştîye wazenê ganî ma semedê şiknayîşê tecrîdî topyekûn têkoşîn bikerê.’’