Çar hetanê dinya ra xeylêk roşnvîr, nuştox û sîyasetmedaranê namdaran medyaya dîjîtale de bi vilakerdişanê xo rojbîyayîşê Rayberê Şarê Kurdî Abdullah Ocalanî fîraz kerd û azadîya Ocalanî waşte. Mesajêkê bi tagê #FreeÖcalan ameyî parekerdene ra tay wina yê:

Candidatura d'Unitat Popular Països Catalans (Yewîya Şarî ya Katalanya-CUP) hesabê xo yê twitterî ra mesajêk vila kerd û vist vîrî ke Abdullah Ocalan 1999 ra nata zîndan de yo. CUPî îfade kerd ke têkoşînê şarê kurdî û heqanê merdiman do ser bikewo. CUPî vat: ''Ma tewrê qîrayîşê #FreeÖcalan benê.''

Akademîsyenê verênî yê Zanîngehê Roma, endamê Grûba S&Dyî ya Parlamentoyê Ewropa Massimiliano Smeriglioyî zî rojbîyayîşê Ocalanî fîraz kerd û vat: ''O raybero tarîxî yê têkoşînê azadîya kurdan o. Ma waştişê azadîya ey rê dewam kenê.'' 

Vervatoxê Îqtîdarê Şarî yê Îtalya (@potere_alpopolo ) Giuliano Granatoyî vilakerdişê xo de vat: ''Ganî ma biwazê ke peynîya tecrîdê xirabî yê vera Ocalanî bêra û azadîya ey bîyarê ziwanî.'' 

Partîya sîyasî ya Swîsre Alternatîfê Bihêzî yê Baselî (BastA!) vilakerdişê xo de vat ke Rayberê Şarê Kurdî Ocalan zîndanê Îmraliyî de tepişîyeno û 2018 ra nata qasê 750 muracatê avûkatan ameyî redkerdene.

Şaredarê Roma Amedeo Ciaccheriyî vilakerdişê xo de vat: ''Rayberê Şarê Kurdî ewro beno 73 serre. O fîlozofêko sîyasî yo tewr pîl ê nê çaxê ma yo, eşkeno Rojhelatê Mîyanênî û dinya de haştî û demokrasî awan bikero û 1999 ra nata Tirkîya de binê şertanê zehmetan de tepişîyeno.''

Ressamê îtalyanî û aktîvîstê heqanê merdiman Gainluca Costantiniyî portreyê Ocalanî yo ke ey bi xêz kerdo bi mesajê ''Rojbîyayîşê to fîraz bo Abdullah Ocalan'' vila kerd.

Sosyalîstanê Reşan ê Amerîka (Black Socialists in America) verî zî hesabê xo de vateyê Ocalanî vila kerdbi û bi wesîleya 4ê Nîsane zî tagê  #FreeAbdullahOcalan vila kerd. 

Endamê Parlamentoyê Ewropa Pernando Barrenayî mesajê xo de vat: ''Bi wesîleya rojbîyayîşê 73. yê Abdullah Ocalanî ez wazena tecrîdî cade bêro wedatine û o azad bibo.''