Vejîya werte ke şîrketê Virgina Emlak o ke semedê dizdan û sîyasetmedarê ke welatê xo ra serwet remnenê gurîyenê muşterîyê înan o tewr verênan ra yew keyeyê Barzanîyan o. Sîteya The American Prospectî mal û mulkê keyeyê Barzanîyan o ke pê xîle û dizdîye Amerîka de fînayo dest eşkera kerd. Sîte de belgeyê serwetê xîleyînî zî ameyî parekerdene.

Goreyê xebera The American Prospectî keyeyê Serekê Herêma Kurdîstanê Federalî Neçîrvan Barzanî nê muşterîyanê dizdan ra yew o. Xebere de ame vatene ke keyeyê Barzanî yo Kurdîstanê Federalî bi monarşî îdare keno pê sextekarîye û xîleyan serweto pîl kerdo pêser. The American Prospect nizdê 300 mulkan pabesteyê merdim şîrîkanê Barzanîyan ê tesbît kerdî. Her çiqas qeydê mulkan bi xîleyan bêrê nimitene zî mulkan ra yew cinîya Barzanî Neibila Bazranî ser  o qeydkerde yo. Merdeyê xala Barzanî Salar Hakimî ser o 288 daîreyî qeydkerde yê. Hîseyê apê ci 100 mîlyonî ra zafêr ê. Sey nînan hema zaf mal û mulk estê ke bi nameyê merdimanê Barzanîyan û pêkerdişanê sexteyan yenê nimitene.