Doç. Aytar: Dîplomasîya Rojawanî serkewte ya

Doç. Dr. Osman Aytarî pare kerd Îdareyê Xoserî yê Vakur û Rojhelatê Sûrîye wextê destpêkerdişî yê îşxalê dewleta tirke ra nata karêko serkewte yê dîplomatîkî kerd.  

Mamostayê Dibistana Berze ya Swêdî-Malardalen Doç. Dr. Osman Aytarî ANFyî reyde qisey kerd û vist vîrî ke destpêkeridişê îşxalê dewleta tirke yê vera Rojawanî ra dima kurdî her ca de têgêrayî û vera îşxalî paştdayîşêko hîra girewt.

Aytarî vat: "Rêxistin û partîyanê kurdan ê Swêdî yê ke 30-40 serr ê nêeşkenê pîya kom bibê seba Rojawanî kom bîyî û platformêk awan kerd. No seba kurdan çîyêko newe bi û zaf girîng bi. No serkewtişê Rojawanî ra yo."

Aytarî pare kerd ke înanê ke bi hawayêkê rexnekerdişî nêzdîyê QSD, YPG-YPJyî bibîyêne zî paştî da Rojawanî, her kes Rojawan reyde têgêra û vat: "Rojawan de gamê girîngî ameyî eştene. Wezîra Karanê Teberî Ann Lînde  seba ke îşxalê dewleta tirke şermezar bika tewrê nawnayîşê paştdayîşê kurdan bîye. Tewrê galaya paştdayîşê Rojawanî zî bîye û vat 'Ez koyê kurdan a.' Temsîlkarê Rojawanî eşkenî bi asanî parlamento de parlamenteran reyde wezîran reyde pêvînayîşan bikê. Nê pêro seba kurdan rewşêka musbet a."

"Hêzê tirkan nê cayan de îşxalker ê. Herême îşxal kerde ke ca bidê ereban la do neçare bimanê ke xo tepîya biancê."

Amed Tersê Zerrîya Tirkîya yo

Aytarî da zanayene ke tersê zerrîya Tirkîya Rojawan ney Amed o û vat: "Oyo ke dewleta tirke ci ra tersena Rojawan nîyo, Amed, Colemêrg, Wan o yanî Vakurê Kurdîstanî yo. Her kes zaneno ke Rojawan ra kerrayêke nêameye eştene Tirkîya, Tirkîya zûran kena ke hêrişê Rojawanî bika. Tirkîya vana ke Rojawan gef ro ma waneno. Terso pîl ê Erdoganî û Tirkîya Amed û Vakurê Kurdîstanî yê."

Aytarî bale ante girîngîya caardişê têkilîyanê dîplomatîkan ê Rojawanî bi Rûsya, DYA, Çîn û zaf welatan û vat: "Tirkîya ke wayîra artêşa pîle ya diyîne ya NATOyî ya kena nêkena nêeşkena waştişê xo bida qebulkerdene. No seba Rojawanî û kurdan serkewtişêko girîng o."