Aktîvîstanê sîyasîyan ê Başûrê Kurdîstanî ra Kîvî Dostkîyî derheqê vengdayîşê ‘Haştîye û Komelê Demokratîkî’ yê Rayber Apoyî de ajansê ma rê qisey kerd.

Dostkîyî ard ziwan ke vengdayîşê Rayber Apoyî hêvîyêka pîle mîyanê kurdan de viraşta û vat: ‘’Serkewtişê nê prosesî waştişê pêro kurdan o. Nê vengdayîşî ra verî pêro partîyanê kurdan de pêvînayîşî ameyî kerdene û fikrê nînan ameyî girewtene. Heyetê Îmraliyî yê DEM Partî pêro partîyê Başûrî zîyaret kerdî.’’

Dostkîyî dîyar kerd ke erkêko pîl keweno milê Serekê YNKyî Bafil Celal Talabanî û Serekê PDKyî Mesûd Barzanîyî ser û vat: ‘’Erkê partîyan o neteweyî yo ke paştî bidê nê prosesî. No paştdayîş do bingeyê yewîya kurdan awan bikero. Başûr bi taybetî warê mîyanneteweyîyî de sey dewletêka xosere qebul beno. Seba ney zî mesuldarîyê pîlî kewenê milê partîyanê Başûrî ser. Ganî pêro partîyê Başûrî hem hetê madî ra hem zî hetê manewî ra destek bido nê prosesî.’’