Qezaya Pirsûsî ya Riha de 14ê hezîrana 2018î de merdimanê Wekîlê AKPyî Îbrahîm Hlaîl Yildizî hêrişê dikanê keyeyê Şenyaşaran kerdbi û dima ke birîndarî wedarîyayî Nêweşxaneyê Dewlete yê Pirsûsî uca de hêrişê keyeyî kerdbi. Hêrişê vera dikanî de Adil û Celal Şenyaşar û hêrişê vera nêweşxaneyî de zî babî Haci Esvet Şenyaşar ameybî qirkerdene.

Emîne Şenyaşar û Ferît Şenyaşar 548 rojî yo vera nê qirkerdişî verê Edlîyeya Riha de nobeta edaletî kenê.

4 serrî yo dosyaya tehqîqatê vera qirkerdişê nêweşxaneyî ser o 'bira nimite' est a û heta nika 9 reyî dozgerê dosya amebi vurnayene.

Ferît Şenyaşarî û avûkatê keyeyî Bulent Duranî vizêr waşt ke derheqê dosya de agahîyan bigêrê û o çax musayî ke dozgerê dosya newe ra vurîyayo.

Keyeyî hesabê xo yê medyaya dîjîtale de vera nê vurîyayîşan wina nêrazîbîyayîşê xo mojna: ''Mehkemeya Riha reyna derbazê tarîxî bena. Dezgehê dewlete de verê kamerayan de sûcê merdimîye ame kerdene. Dozgerê dosya 9 reyî vurîyabi û dozgero 10. zî ame. La derheqê dosya de bira nimite est a.''