Bajarê Dusseldorfî yê Almanya de bi hezaran kesê ke ameyî têhet bi slogana ''Kurdîstanî bipawê''  verê Parlamentoyê Eyaletê NRWyî de mîtîng kerd.

 Bi nameyê Rojhilatî Hurîya Ahmedî, bi nameyê Rojawanî Bavê Narîn, bi nameyê Vakurî Sabrî Erygi û bi nameyê Başûrî Ahmet Silemanî, bi nameyê cinîyan Besime Konca qisey kerd. Qiseykerdişan de hêrişê dewleta tirke yê vera Zap û Avaşînî û îxanetê PDKyî ameyî şermezarkerdene.

Hemserekê KNKyî Ahmet Karamus nê vatî: ''Hêrişê îşxalî  destkewteyanê kurdan hedef genê. Dewleta tirke bi çekanê kîmyewîyan û paştîdayîşê hemkaranê xo yê cayîyan hêriş kena. No şerê vera PKKyî nê vera çar leteyanê Kurdîstanî yo. No hêrişê vera destkewteyan û serkewtişê kurdan, vera statuyê Şingal û Rojawanî yo. Ma tîya ra veng danê Barzanîyî keso ke destê xo dano dişmenîş û şarê xo rê îxanet keno nêeşkeno bibo temsîlkarê şarê kurdî.''

Sereka Komîteya Rayberdişî ya Meclîsê Sûrîyeya Demokratîke (MSD) Îlhame Ehmed bi slogananê "Bijî berxwedana Efrînê"  xîtabê şarî kerd: ''Ma rojanê tarîxîyan ra ravêrenê. Na seserre semedê kurdan seserra estbîyayîş û çînbîyayîşî ya. Têgêrayîşê Azadîye yê Kurdan semedê şarê kurdî û şaranê Rojhilatê Mîyanênî îmkanê pîlî vetî werte. Dewleta tirke azadîya kurdan çînbîyayîşê xo vînena. Coka pê paşta NATO û dewletanê dinya hêrişê têgêrayîşê azadîye  û şarê kurdî kenê. Şorişê Rojawanî çend şino beno pîl û letayanê bînan ê Kurdîstanî û dinya rê beno nimûne. Coka dewleta tirke wazena çîn bikero. Dewleta tirke bi bahaneyê PKKyî hêrişê şarê kurdî kena. Başûrê Kurdîstan bi gonîya şehîdan ame ronayene. Ganî nika partî û îdarekarê ci goreyê nê têbigêrê. Ma veng danê heme partîyanê kurdan û selahîyetdaranê Başûrê Kurdîstanî ma na hela azadîye xo destî ra nêremnê. Yewna seserre wina firset nêkewno ma dest. Ganî ma heme waran de, her hetî ra têkoşînî xurtêr bikerê.''

Sîyasetmedarê kurdî Hatîp Dîcle zî nê vatî: ''Ez verî şehîdanê ma yê ezîzan yad kena û heme têkoşêranê koyan, deştan, dewan, bajaran û zîndanan zerrîya safîye ra selam kena. Bitaybetî zî  Abdullah Ocalano ke 24 serrî yo têkoşîn dano ma ey bi hezaran rey selam kenê.  Hêrişê dewleta tirke semedê îşxalê Musul, Kerkuk, Şingal û Rojawanî yenê kerdene. Seba ke kurdî Şerê Dinya yê Hîrêyînî de wayîrê statuyî mebê hêriş kenê.''