Meclîsê Temsilkarano ke perto cêrin yê Kongreya Amîrîka yo de vera Tirkîya pêşnûmaya qanunî pêşkeşê dengdayîşî bî û bi dengê zafîya parlementeran ame qebulkerdene. Meclîsê temsilkaran de 403 parlementeran reya “erê”yî xebitnaye û tena 16 endaman vera nê pêşnûmayê qanunî reya xo daye. 

Partîya komarperweran ra yew parlementerî derheqê reydayîşî de qisey kerd û nîşan kerd ke ê galê “hevalbendê înan kurdan” kerdişê Dewleta Tirkan ra serkewte qesawete de yê. Qiseykerdoxî nîşan kerd ke ganî rayîr mederîyo binpaykerdişê heqanê merdiman ke Dewleta Tirkan kena. Pêşnûmaya qanunî verî ke pêşkêşê Serokê DYA Donald Trumpî biba ganî Senato de zî pêşkêşê reydayîşî biba. Pêşnûma qanunî de vera Tayyip Erdoganî, wezîranê ey û gelek rayedaranê Dewleta Tirkan hêzê caardişî êno ferzkerdene. Hêzê caardişî bi taybetî Tayyîp Erdoganî, Artêşa Tirkan û şîrketê ke na artêşe reyde xebitîyenê ser o êno ferzkerdene

Erdogan, Hetkar Û Wezîrê Ey Lîsteyê Hêzê Caardişî De Yê

Îdarekarê Tirkanê ke vera ci hêzê caardişî do bêro ferzkerdene nê yê : Serokkomar Tayyip Erdogan, Alîkarê Serokkomarî Fuat Oktay, Wezîrê Pawitişî yê Milî Hulusî Akar, Wezîrê Karanê Teberî Mevlut Çavuşoglu, Wezîrê Enerjî û Çimeyanê Xozayî Fatîh Donmez, Wezîrê Xezîne û Malîya Berat Albayrak û Wezîra Bazirganîye Ruhsar Pekcan.

Artêşa Îşxalkarê û Şîrketê ke Tey Kar Kenê Kewtê Verê Hêzê Caardişî

Pêşnûma de Artêşa Tirkan a îşxalkere û şîrketê ke tey xebitîyenê kewtê verê hêzê caardişî. Pêşnûma de eynî wextî de hetkarîya merdimî, ya weşîye û îstîxbaratî ya ke bi nê kesan yan zî sazîyan reyde bena zî kewta verê hêzê caardişî û eynî wext de êno qedexekerdiş ke DYE yan zî Artêşa xo çek û cebilxaneyî mêroşa bi Artêşa Tirkan. Pêşnûma de êno waştene ke vîze mederîya Erdogan û wezîranê ey. Çîyo balkêşo ke derheqê sermayeya Erdoganî de raporek zî ameya waştene. Yeno pawitene ke pêşnûmaya qanunî Senatoyî de zî bêra qebukerdene.