Vervatoxa HDPyî Ebru Gunay merkezê pêroyî yê HDPyî de kombîyayîşê çapemenîye kerd û rojdem ercna.

Qiseykerdişê Gunaye ra beşêk wina yo:

''120 zîndanan de grevê vêşanîye 57 rojî yo dewam keno. Tecrîd û îşkence zîndananê Tirkîya de bi taybetî Îmrali de bi hawayêkê sîstematîkî yeno caardene. Sere de CPT xeylêk rêxistinan seba wedaritişê tecrîdî veng da la îqtîdar tecrîd pêro welatî ra vila kerd. Waştişê tepişteyan meşrû û demokratîk ê. Nê çalakîkerê grevê vêşanîye seba HDP merdimê ercîyaye yê û ma venga rayaumûmîye danê ke vera tehlukeyî nêrazîbîyayîşê xo bimojnê.

Serranê peyênan de key Wezîrê Pawitişî û AKP Iraq zîyaret bikerê şer vejîyeno û gonî rijîyena. Xora Herêma Kurdîstanî ganî Tirkîya reyde pêvînayîşan bikera la ma hêvîdar ê ke nê têkilîyî bingeyê demokratîkî de ganî bêrê kerdene. Ma Îdareyê Herêma Kurdîstanî ra pawenê ke dişmenîya AKPyî ya vera kurdan qebul nêkero. Şerê zereyî têna do zerar bido kurdan.

Ma do 6ê çeleyî de kombîyayîşê Hemserekanê Şaristanan û 10ê çeleyî de zî kombîyayîşê Meclîsê Partîye bikerê. Ma qerardar ê ke serra 2021 bikerê serra têkoşînê vera AKP-MHPyî. Ma do komel bikerê îqtîdar. Oyo girîng paştdayîş û têkoşînê ma yo.''