Hemserokê Partîya Yewîya Demokratîke (PYD) Şahoz Hesenî galê îşxalî, metodê çarekerdişî û kombîyayîşê komîteyê qanunê bingeyênî nirxnayî.

Hesenî vat, rewşa mewcute ya Vakur û Rojhelatê Surîye rewşeka kaosî ya, serebûtê ke herême de qewemîyenê bi temamî problemê Surîye eleqedar kenê û nîşan kerd “Çimê hêzanê cayî û teberî herêma Rojawanî ser o yê, çunke no erd hem bi çimeyanê xo yê xozayî hem zî hetê kulturî ra zengîn o. Reyna cuya demokratîka ke herême de ameya awankerdene, tecrubeyê ke na babete de ameyê afirnayene û herême ser o tesîrê kurdan, dewletanê cîrananê Surîye bi taybetî zî Dewleta Tirkan aciz kenê.

Serra 2011î ra bîyo Dewleta Tirkan polîtîkaya xo ya Surîye bi plan û projeyanê xo yê vera nê erdî amede kerde. Na yewe ra serkewte paştgîrî daye komanê cergan ke galê herême bikerê. Dewletanê Tirkana ke nêeşkaye bi komanê cergan ê El Nusra û DAÎŞî çîyo ke wazena bîfîyo dest, nika bi xo cad kena ke herême îşxal bikera.

Armancê Dewleta Tirkan o yo ke bi galanê îşxalî statuyê kurdan asteng bikera û sîstemo ke kurdan, ereban, suryanan, armenîyan û pêro raameyîşanê herême seba cuya hempare afirnayo çin bikera.”

'Xoverdayîşî Planê Înan Tedeberd‘

Hesenî nîşan kerd ke destpêkî ra bîyo ê cad kenê ke pêro probleman bi dîyalogî çare bikerê û vat “Na çarçewa de bi rayîrê DYA taye çîyan de ma ameyme were labelê Dewleta Tirkan her rey planê xo yê seba îşxalê Rojawanî ramit. Bi nê armancî peynî de bi komanê cerganê xo galê herême kerd ke îşxal bikera.

Nê prosesî de ma hem hişyarî daye DYA hem zî daye Rusya û ma vat ke cadkerdişê îşxalê Dewleta Tirkan do tena tesîrê kurdan mekero, eynî demî de do tesîrê şaranê herême zî bikero û Surîye newe ra do bifîyo mîyanê kaosî. Ma nîşan kerd ke eke çareyek mero peydakerdene ma do vera her tewir îşxalî xo ver biderîme. Naye ser o Dewleta Tirkan tercîh kerd ke herême îşxal û komkîştoxîye bikera. Ma zî bi hawayeko heqdar dest pê xoverdayîşî kerd.

Xoverdayîşê ma yê vera îşxalî planê înan têser û têbin kerdî. Xoverdayîşê ma û paştgîrîya heqdar ê şaranê dinya seba xoverdayîşê ma dinya de rojeveka neweye afirnaye. Na yewe ra serkewte zî dewlatan neçare sîyasetê xo vurena.”

'Ma Estbîyayîşê Îşxalkeran Çirey Qebul Nêkenê'

Derheqê pêkerdişê Rusya û Dewleta Tirkan a îşxalkere de Hesenî bale anite beyanatê QSDyî ser û vat “Ma erdê xo ser o estbîyayîşê îşxalkeran qebul nêkerdo. Çîyo ke ma qebul kerdo tena adirbest o. Nê demî de Rusya, DYA û dewletanê Ewrupa reyde yewbîndîyayîşan de ma cad kerd ke çareyêk peyda bikerê. Ma her kesî ra vat ke ma plananê îşxalî yê Dewleta Tirkan ê vera Vakur û Rojhelatê Sûrîye çirey qebul nêkenê û ma vera na yewe do xo ver biderê.

Ma vanîme ke adirbest yan zî îtîfaqî seba demê ameyoxê Sûrîye eşkenê bivurîye dîyalogî ser. Sînorî ser ameyîşê hêzanê Rejîmî ra dima do bahaneyê îşxalê Dewleta Tirkan mîyan ra wedarîyo. Na yewe ser o eke tirkî herême de bimanê o taw do şarê Sûrîye xo ver biderê.

Erdoganî DYA reyde peymane qebul nêkerde, çunke wazeno ke Vakur û Rojhelatê Sûrîye îşxal bikero. Ma hem Rûsya hem zî DYA ra vat ke tirkî do gore adirbestî û pêameyîşî tevmegerê, xora çîyo ke nika qewemîyeno zî na yewe nîşan dano. Tirkî adirbestî û peymanan tim gênê binê payanê xo.”

'Cenevre De Bê Ma Çare Nêno Warye‘

Hesenî bale anite komîteya qanunê bingeyênî yê Sûrîye ser ke bê temsîlkaranê Vakur û Rojhelatê Sûrîye ênê were û vat “ma naye ra verî zî zaf rey ard ziwan ke krîzê Sûrîye bi nê hawayî çare nêbeno. Ma ke tewrê kombîyayîşanê Cenevre mebîme çare nêno warye. Helwesto ke tena beşêkî vejeno ver û vano “muxalefet no yo” nêeşkeno meseleyan çare bikero. Meseleyê komelkî yê ke yew şerê giranî ra serkewte vejîyê meydan bi destê tayê hetanê ke hetê tayênan ra ameyê nîşankerdene çare nêbenê. Eke çare estbo ganî pêro hetî mîyan de bê. Yew het de rejîmo ke no 50 serrî yo bîyo sebebê vejîyayîşê meseleyanê kulturî, aborî yê mîyanê komelî, heto bîn de zî tayê komê ke bi paştgîrîya taye welatan eşkenê lingan ser o vinderê û sey “muxalîf” ênê namekerdene estê. Nê komê ke tewr zaf Tirkîya paştgîrîya înan kena, hêzê radîkal ê cîhadîstan ê û bi nameyê “muxalefetî” yew hetê masa de dayîyê roniştene û bi nê hawayî kenê ke înan biderê qebulkerdene.

Yew hêzo demokratîk esto ke nîyamo vengdayene labelê Sûrîye de rayîro hîrêyinî temsîl keno. Sîstemê xoserîya demokratîk ne girêdayîyê Rejîmî ne zî girêdayîyê hêzanê herêmîyanê bînan o. Tek hêzo ke Sûrîya demokratîke wazeno ma yîme labelê ma dormeyê masa de çin îme. Seba ke ma masa de çin îme şerî rê çare nêno dîyene. Her kes zano ke nê erdî ser o tek hêzo demokratîk ma îme. Masa de çinbîyayîşê ma seba demê ameyoxî yê Sûrîye kêmîyêka pîl a. Êyê ke dormeyê masa de yê pawitişê menfeatanê xo dima yê labelê caardişo xoser estbîyayîşê Sûrîya Demokratîke paweno.”

'Eke Seba Sûrîye Çare Yeno Waştene o Taw Ganî Destê Tirkîya Bêro Birnayene‘

Hesenî vat "Vateyê 'Tirkîya qebul nêkena’ bahane yo. Dewleta Tirkan xora ma qetil kena, wazena ke ma çin bikera. Eke tirkan reyde cad bikerê o taw do seba Sûrîye çirey çareyêk mêro paydakerdene. Ma her tim vanê ke ma qebul nêkenê ke na rewşe helwestê tirkan ra bêra girêdayene. Tirkîya, Îran û Rûsya ke koma Astana yê, wazenê ke her çîyo ke Sûrîye de êno kerdene binê kontrolê înan de bo. Bi nê helwestî çare do çirey mebo. Bi taybetî zî bi helwestê barbar û dişmenîya Tirkîya Sûrîye de çare do mêro peydakerdene. Eke çareyêko rastikên yeno waştene o taw ganî na mesela de destê Tirkîya bêro birnayene.”  Hesenî seba hêzanê Rejîmî reyde îtîfaqê înan zî vat ma tena derheqê sînorî de ameyme were, ma tim ard ziwan ke ma amede yê ke Rejîmî reyde dîyalogî ronê.