Komîteya Wezîran a Konseya Ewropa bira xo ya bi nameyê 'Ocalan-2' çend rojî verî eşkera kerde. Mehkemeya Heqanê Merdiman a Ewropa (MHME) zî verî pare kerdbî ke tepiştişo muebede vera qedexeyê îşkenceyî yo û Tirkîya ra waştbi ke ganî  nê warî de çi hewce yo bikera. Labelê 'huqûqo taybet' ê vera Rayberê Şarê Kurdî Abdullah Ocalanî û tepişteyanê bînan roje bi roje giran beno.

Avûkat Kamîl Tekîn Surekî bira 'Ocalan-2' ya Komîteya Wezîran a Konseya Ewropa û birê MHME ANFyî rê ercnayî.

Avûkat Surekî eşkera kerd ke huqûqê înfazî yê modernî de cezaya muebede goreyê nêzdîbîyayîşê Tirkîya nêna ercnayene û vat: ''Huqûqê modernî de hînî cezaya muebede çin a. MHME naye sey 'heqê hêvîye' pênase kena. Yanî kesê ke ceza gênê ganî hêvî bikerê ke rojêke bêrê veradayene û goreyê ney têbigêrê. Eke heqê hêvîye çin bo o kerdiş beno îşkence. Sey pawitoxanê heqanê merdiman û avûkatan destpêkî ra nata Abdullah Ocalanî de na bira MHME pawite.''

Surekî bale ante ser ke tepişteyê ke cezaya muebede dîyaya înan her heqî ra dûrî yenê vistene û vat: ''Heqê înan ê pêvînayîşî, têkilîye, sporî ûsn. yenê astengkerdene. Nê kesî bi sereyê xo tepişîyenê. Nê kesî têna eşkenê ferdê keyeyê xo bivînê. Destûr nedîyeno ke nê kesî avûkatanê xo zî bivînê. Na rewşe de avûkatî muracatê MHME kenê. La dewlete vana 'Xora înan cezaya muebede girewta, hewce nêkeno ke ê avûkatanê xo bivînê.' Cayê nê kerdişan huqûq de çin o.''