Qanûnê Dezenfermansyonî yo ke hetê AKP-MHPyî ra ameyo amadekerdene, do çapemenîye û medya sansur bikero, otosansurî bizêdîno û cayê rojnamegeran teng bikero.

Faruk Balikçiyo ke 30 serrî yo Amed de rojnamegerîye keno û waranê cîyayan ê medya de xebitîyayo, qanûnê sansurî ANFyî rê ercna.

Balikçiyî pare kerd ke eke qanûnê sansurî bêro vetene na rewşe bi xirabî tesîrê karanê rojnamegerîye do bikera. Balikçiyî îfade kerd ke eke welatêk de medya azad nêba demokrasî nêna ci.

Balikçiyî vat: ''2015 ra verî Ewropa ra yan zî temsîlkarîyanê Ewropa yê Îstanbulî ra rojnamegerî ameyêne tîya û meseleya kurdan ser o cigêrayîşî kerdêne. La 2015 ra dima tedaya vera çapemenîye giran bîye, ney zî tesîrê rojnamegeranê Ewropa kerd û hînî ê nênê cografyaya kurdan.  Îqtîdar wazeno pê qanûnê sansurî komelî bikero yew reng, yew veng û yew fikr. Aseno ke xeylêk rojnamegerî rewşa winasêne de do bêrê tepiştene, karê înan ê xebere bêrê astengkerdene û rojnamegerîye do bêra bêtesîrkerdene. Eşkera yo hûmara rojnamegeranê tepişteyan û rojnamegeranê ke karî war verdenê, do bizêdîya.''

Balikçiyî îfade kerd ke rojnamegerî hînî nêeşkenê bi serbestî qala demokrasî bikerê û vat: ''Hukmat wazeno hem karanê rojnamegerîye hem zî pêro torranê medyaya dîjîtale bikero binê kontrolê xo. Vera çapemenîya kurdan cara teda est a. Her kes zaneno ke 16 rojnamegerê kurdî seba ke xeberî viraştî tepişîyayî. Çîyê ke yenê rojnamegeranê kurdan sereyî hînî vila benê. Tirkîya bîya zîndanê rojnamegeran. Ê xîret kenê ke qelema rojnamegeran bişiknê.''