Endamê Heyetê Rayberdişî yê Odaya Tabîban a Îstanbulî Dr. Murat Ekmezo ke grevê vêşanîye yê vera tecrîdê Îmraliyî teqîb keno vist vîrî ke tecrîd û îşknece vera merdimîye gef o û seba têkoşînê hemparî veng da.
Grevê vêşanîye yê vera tecrîdê Îmraliyî û binpaykerdişanê heqanê tepişteyan roja 221. de dewam keno. Endamê Heyetê Rayberdişî yê Odaya Tabîban a Îstanbulî Dr. Murat Ekmezî derheqê grevê vêşanîye de qisey kerd.
Ekmezî pare kerd ke grevê vêşanîye mîyanê şert û mertanê janî de dewam keno la rixmê ney zî sîyasetmedar, baro û dezgehî vera rewşe bêveng ê. Ekmezî vat: ''Ma sey Heyetê Teqîbkerdişê Grevê Vêşanîye pê rewşe qerqilîyenê. Tecrîd bi xo metodêkê îşkenceyî yo û ganî zêdêr bêro rojdem. Tepişteyî verî zî bi heman waştişan kewtbîyî grev. Semedo ke tepişteyan rê rayîrêko bîn nêmaneno grev kenê.
Tecrîd vera pêro merdimîye gefêk o û nika zî no tecrîd pêro welatî ra vila bîyo. Ganî Wezaretê Edaletî û rayaumûmîye derheqê mesele de zêdêr baldar bibê û mesuldarîyanê xo bîyarê ca. Sîstemê tecrîdî yê Îmraliyî yewna cayê dinya de çin o. Vera nê tecrîdî ganî pêro merdimî têkoşînê hemparî bikerê. Azadîye seba merdiman sey awe û hewayî girîng a. Wa her kes babeta grevê vêşanîye de mesuldarîya xo bîyaro ca.''
