Hemserekê Konfederasyonê Sendîkayanê Kedkaranê Umûmîye (KESK) Mehmet Bozgeyîkî derheqê krîzê ekonomîkî yê Tirkîya de ANFyî rê qisey kerd.

Bozgeyîkî da zanayene ke enflasyon resayo se ra 150 û şar vera beno xizanêr. Bozgeyîkî vat: ''Dezgehê Îstatîstîkî yê Tirkîya (TUÎK) wexto ke reqamanê enflasyonî eşkera keno manîpule keno.  Reqaman kêm mojneno ke wa meaşê karmendan zî nêzêdîyo. Goreyê ENAG û KESK ARî enflasyon se ra 150 derbaz kerdo. Seba ma nîşaneya bingeyî no yo ke endeksê vaybîyayîşê berheman zêdîyeno. ''

Bozgeyîkî vist vîrî ke Bankaya Merkezî nîsbetê faîzî se ra 14 ra kerd se ra 13 ke no zî ekonomî qels keno. Bozgeyîkî vat: ''Bi nê hawayî xizanîye vila bena, deynî zêdîyenê, erjê lîra kêmîyeno. Heta menga kanûne dolar do bibo 19 lîra. Ekonomîya Tirkîya prosesê resesyonî de ya. Rojanê verê ma de zî do krîzê enerjî dest pêbikero. Zimistan de krîz do bibo pîlêr.''

Bozgeyîkî bale ante ser ke ne îqtîdar ne zî muxalafet seba çareserîya krîzî plananê xurtan nêanê verê şarî û vat: ''Seba çareserîya krîzê ekonomîkî modelo newe lazim o ke do hetê menfatê demokrasî, kedkar û ekolojî de bibo. Seba ke ma na rewşe ra xo bixelisnê ganî cinî, karker, xizan, wendekar û dewijî têkoşînê hemparî bikerê. Eke wina nêbo ma do nêeşkê krîzî ra nefes zî bigêrê. Vera ney ganî ma seferberîyêka têkoşînî ya topyekûne bidê destpêkerdene.''