Wekîlê HDPyî yê Îdirî û Endamê Komîsyonê Karanê Komelkîyan, Xebatan, Weşîye û Keyeyan ê Meclîsî Habîp Eksîkî derheqê budçeya 2022î de ANFyî rê qisey kerd.

Eksîkî vist vîrî ke budçeya Wezîrîya Weşîye do 25ê teşrîna peyêne de do bêra nîqaşkerdene. Eksîkî eşkera kerd ke budçeya Wezîrîya Weşîye sey 116 mîlyar lîra ra zêdêr ameye mojnayene la wexto ke bedelê kîra û bara nêweşxaneyanê şaristanî ya bi 22 mîlyar bêro vetene têna 94 mîlyar maneno.

Eksîkî pare kerd ke mîyanê welatan de tewr tay Tirkîya budçe dana dezgehê weşîye û vat: ''Budçeya Tirkîya bi temamî 1 trîlyom 750 mîlyar a. Zafê na budçe semedê şerî yena cakerdene. Îqtîdar vera vano 'Ma SÎHA, ÎHA, tank û topî ber ardî.' Budçeya wezîrîyanê bînan zî dîyena şerî. Mîsal Wezîrîya Weşîye vana 'Ma Efrîn de, El Bab de nêweşxaneyî viraştî.'

Nika tewr tay 350 personelê weşîye pabeyê tayînî yê. Hetê bînî ra xeylêk personelê weşîye zî ppê KHKyan karî ra yenê eştene. Budçe sey xortumî şina nêweşxaneyanê şaristanî. Îqtîdarî qaşo 40 hezar kesî tayîn bikerdêne la nêkerd.''

Eksîkî ard ziwan ke HDP do meseleyanê weşîye çareser bikero û vat: ''Goreyê ma weşîye ganî bêra komelkî û demokratîk. Îqtîdar warê bi nameyê 'turîzmê weşîye' akerd la heqê weşîye global o. HDP wazeno heqê weşîye her kesî rê bi hawayêkê têdûştî bêro dayene û xizmeyê weşîye yê bi ziwanê dayîke bêro dayene. Ganî waştişê kedkaranê weşîye bêrê caardene.''