Bado ke ame eşnawitene ke CPTyî Rayberê Şarê Kurdî Abdullah Ocalanî dir pêvînayîş nêkerdo çalakîyê vera tecrîdî zêdîyayî. 11ê kanûne de Amed û 12ê kanûne de Wan de tecrîd do bi rayraşîyayîşî bêro şermezarkerdene. Wekîlê HDPyî yê Idirî Habîp Eksîkî ke ANFyî rê qisey kerd, semedê tewrbîyayîşê rayraşîyayîşî veng da.

Eksîkî vat: “Ma ewro pêro komelî rê nê vanê; eke ma ewro vera tecrîdê Îmrlaiyî mevejîyê, siba çew nêeşkeno na cografya de nefes bîgêro. Vera nê xespkerdişê heqê merdiman û îşkenceyî ganî her kes destê xo bikêro binê kerra. Dezgehê mîyanneteweyîyî seba ke meşruyetê xo vînî mekerê ganî şirê Tirkîya ser ke tecrîd bêro wedaritene.  Wan de 12ê kanûne de do aktîvîteya demokratîke bêro kerdene. Gannî her kes tewrê ci bibo û vera îşkence û tecrîdî, huqûq, edalet û haştîye bipawo. Wa nêro vîrakerdene ke tecrîd zafhetin o. Wedaritişê tecrîdî berê çareserkerdişê meseleya kurdan akeno. No îqtîdaro ke semedê tecrîdî kerdo xo çeng, eşkera yo ke nêeşkeno xizmetê şaran bikero û çîyêk bido şaran. Coka keno ke pê tecrîdî  û şerî payra bimano. Vera polîtîkayanê îqtîdarî de vindertiş wezîfeyê merdimîye yê pêron o. Coka ganî têna şarê kurdî nê heme şarê Tirkîya û Rojhewlatê Mîyanênî semedê ameyox û azadîya xo vera sîstemê tecrîdî vejîyê û çalakî û aktîvîteyanê dmeokratîkan de vengê xo berz bikerê û tewirê xo ramojnê.”