Rêxistinanê elewîyan vera amadekarîya qanûnê 'Serekîya Cemxane û Kulturê Elewî-Bektaşîyan' ver bi Meclîsî çalakîyêka rayraşîyayîşî kerde ke qanûn ewro Meclîs de bêro nîqaşkerdene.

Bi seyan elewîyan bi sloganê 'AKP do hesab bido', 'hemwelatîya têdûşte' çalakîya xo kerde. Wekîlê HDP, CHP û TÎPî, rêxistinê sey KESKî zî tewrê çalakîye bîyî. Elewîyan dima verê berê Meclîsî de kilamî vatî, tembûr da piro û pankarta 'Elewîtîye denêbena tewreyêkî, qanûnê xo apey bigêrê' akerde û sloganî vatî.

Serekê Federasyonê Komeleyanê Elewîyan (ADFE) Celal Firatî naeyê rêxistinanê bînan ser o eşkerayîya hempare wende. Eşkerayîye de ame vatene ke polîtîkayê înkar û îmha yê vera elewîyan dewam kenê û yeno waştene ke elewîyî bi temamî bêrê qirkerdene.

Firatî ard ziwan ke AKP bawerî û nasnameyê elewîtîye red keno û vat: ''Îqtîdar elewîtîye sey tradîsyonêkê sûnîyan mojneno û bi nê hawayî elewîtîye rê red keno. Çîyo ke ma bi se serrran o qîrenê reyna vajê: elewîyî est ê, elewîyî tîya de yê û elewîtîye heq a. Hêzê sîyasî ganî seserra diyîne ya Komare de têkilîya yewbîyaye ya welatî newe ra şirove bikerê û îradeyêkê xurtî vejê werte. Ma bi bawerîya xo, bi yewî û xoverdayîşî derheqê esasê têdûştîye de ameyoxêkê demokratîkî û layîkî awan bikerê.''