Îlahîyatnas û nuştox Îhsan Elîaçikî derheqê teda û zorbazîya rejîmê AKP-MHPyî û Erdoganî de qisey kerd.

Elîaçikî ard ziwan ke Hunerê Erdoganî tim sûckerdiş o û vat: ''Erdogan asta tewr berze de elîtîzm keno labelê muxalîfanê xo pê elîtîstî sûcdar keno. Ê xo sey mexdûrê dîndarî yê Tirkîya vînenê. La ê qesran de bi kêfweşîye ciwîyenê. Îqtîdarî bi taybetî wextê xo yê peyênî de teda zêdînenê. Seba ke îqtîdarê înan nêkewo xo ver danê. Wazenê Serekkomar teqawut bibo zî bieşko cuyêka elîtîst û lukse dewam bikero.''

Elîaçikî îfade kerd ke ê nêwazenê îqtîdarî ra dûrî bikewê û vat: ''Înan sûcê giranî kerdî. Wextê nê îqtîdarî de qirkerdişî ra qeçaxîya pereyan zaf sûcî ameyî kerdene. Reyna zî vera înan gamêke nêameye eştene. La hem warê mîyanneteweyî de hem zî welat de dosyayê neweyî do bêrê akerdene. Îqtîdar zaneno ke naye ra pey cuye seba înan xirab a. Nê tersî ra nêeşkeno ra bikewo. Seba ke îqtîdarê înan nêkewo bi her hawayî teda kenê.''