Îran û Rojhelatê Kurdîstanî de çalakîyê vera qetilkerdişê Jîna Emînî dewam kenê. Endama Meclîsê Cinîyan ê HDPyî Elîfe Bulut derheqê babete de ANFyî rê qisey kerd.

Bulute dîyar kerd ke îqtîdarê camêrdan xîret kenê ke bi metodanê zorbazan cinîyan îdare bikerê û vat: ''Sere de Tirkîya îqtîdarê welatanê otorîteran ê sey Îranî xîret kenê ke cinîyan dîzayn bikerê. Têna Îran de nê Tirkîya de, Ewropa de û her ca de îqtîdarê camêrdan tedaya cinîyan kenê. Îran de serewedaritişê şarî têna vera qetilkerdişê cinîyan dest pênêkerd. Ganî ma welatê xo de zî vera qetilkerdiş, tepiştiş û surgunan seba vurnayîşê sîstemê camêrdan têkoşîn bikerê.

Îran û Tirkîya de meseleyê cinîyan seyci yê. Têna Îran de bi qanûnan, bi hawayêkê fermî no yeno kerdene. Tirkîya de tedaya vera cinîyan nêasena. Ma bi vateyanê 'Ti kêna ya, rind ronişe, bi vengêkê berzî qisey mekere' benê pîl. Îqtîdaro winasên est o ke nê hêrsê vera cinîyan zêdîneno. Derdê nê îqtîdarî no yo ke cinîyî domanan bîyarê, goreyê înan têbigêrê. Her roje nê welatî de tewr tay 3 cinîyî yenê qetilkerdene.''

Bulutu ard ziwan ke cinîyê kurdî xoverdayox û çêr ê û têkoşînê înan ê vera DAÎŞî zî mîsalê ney o tewr pîl o. Bulutu bale ante ser ke îqtîdarê AKPyî yê 20 serran de cinîyan bedelê giranî dayê û vat: ''Seba AKPyî cinîyê mehqûl û cinîyê nemehqûlî est ê. Nê cinîyê nemehqûlî ê yê ke vera AKPyî têkoşîn kenê, xo ver danê. Coka AKP vera nê cinîyan hêrişan keno. Wekîlê ma yê cinîyî zîndan de yê û vera înan nêzdbîyayîşê cîyakerî est ê. Cezayê ke dîyayê Aysele Tûglûk, Semra Guzel, Leyla Guven îsbatê ney ê.''

Bulute da zanayene ke rixmê rejîmanê zorbazan zî pêro dinya de têkoşînê cinîyan do geş bibo.