Avûkatanê Buroyê Huqûqî yê Asrinî ra Emran Emekçî derheqê tecrîdî de ANFyî rê qisey kerd.

Emekçîyî ard ziwan ke armancê tecrîdê Îmraliyî çinkerdişê îradeyê muxalîfan o. Emekçîyî vat: ''Seke Birêz Ocalanî vatbi tecrîd bi grevê vêşanîye nêqedîyeno. Tecrîd bi caardişê wezîfeyan ê polîtîkan, bi rêxistinbîyayîşê mîlyonan, bi kulturê demokrasî qedîyeno. Hîşmendîya îqtîdarî zî têna bi tecrîdî eşkena estbîyayîşê xo dewam bikera. Nika tecrîd pêro zîndanan de û her warê cuye de vila bîyo. Eke blokê demokrasî xo rêxistin bikero eşkeno nê tecrîdê mutlaqî wedaro.''

Emekçîyî da zanayene ke rixmê astengîyan zî ê têkoşînê huqûqî dewam kenê, raporanê xo pêşkêşê CPTyî kenê.

Emekçîyî vat: ''Mehkemeya Heqanê Merdiman a Ewropa (MHME) serra 2014î de bire daye ke ganî tewr zaf cezaya 25 serran bêra dayene Birêz Ocalanî. Serra 2024î de nê 25 serrî qedîyenê. Ma pê rapor û waştişan xîret kenê ke nê karî hîna lez bidê kerdene. La rixmo ke 6 serrî derbaz bîyî seba caardişê bira MHME pêşnîyazêk zî nêame kerdene. Yanî ganî têna tecrîd nê azadîya Birêz Ocalanî zî biba rojdem. ''