Emîne Şenyaşara ke laj û mêrdeyê ci hetê merdimanê wekîlê AKPyî Îbrahîm Halîl Yildizî ra kişîyayî lajê xo Ferît Şenyaşar reyde 114 rojî yo nobeta edaletî kena. Keyeyê Şenyaşarî pê telefonî Fadil Şenyaşaro ke 3 serrî yo Zîndanê Xarpêtî de tepişîyeno reyde qisey kerd.

Emîne Şenyaşar derheqê pêvînayîşê telefonî de qisey kerd û vat: ''Lajê mi 3 serrî yo hucreyê yewkesî de tepişîyeno, birayê ci û babîyê ci kişîyayî. Destê ma ra çîyêk nêno. Ma şîyî Anqara, Îstanbul la çîyêk nêbi. Ê hê lajê mi zîndan de kenê pûç, baxçeyê edlîye zî ma rê kenê qedexe. Ma rê zulm kenê.''

Ferît Şenyaşarî zî nê çîyî vatî: ''Ma rê neheqîye û bêedaletîye ameye kerdene. Birayê mi zî paweno ke rojêke edalet do bêro caardene, zîndan de xo ver dano. Ma kenê ke vengê ey bidê eşnawitene. ''

Keyeyî hesabê xo yê twitterî de no mesaj vila kerd: ''Bêedaletîye ra pîlêr yew webal esta gelo? Şima key nê feryadê ma eşnawenê? Ey Edalet!''