Keyeyê Şenyaşarî 40 serrî yo qezaya Pirsûsî ya Riha de esnafîye kerdêne. 14ê hezîrana 2018î de keye pê fermanê Wekîlê AKPyî Halîl Îbrahîm Yildizî raştê qirkerdişî ame. Yildiz a roje seba karê weçînayîşî dekeweno dikana Şenyaşaran û vano waştişê înan esto yan çin o. Keyeyê Şenyaşarî zî vano 'Merdimê xo şîyar bikerê, roniştoxan ecîz kenê, qiseyan erzenê kêna û cinîyan.' Naye ser o Yildiz wexto ke dikane ra vejîyeno nîşan dano û merdimê ey hêrişê keyeyê Şenyaşarî keno.

Hêriş de Adil, Mûhammed, Mehmet, Ferît û Celal Şenyaşar birîndar benê û wedarîyenê nêweşxane û tîya di birayî hetê merdimanê Yildizî ra yenê qetilkerdene. Babî Haci Esvet û dadîye Emîne Şenyaşar şinê Nêweşxaneyê Dewlete yê Pirsûsî. Merdimê Yildizî nêweşxane de pê kardan hêrişê Emîne û Esvet Şenyaşarî kenê. Babî Esvet Şenyaşar nêweşxane de yeno kiştene. Fadil Şenyaşaro ke hêriş de birîndar bi, tedawî ra dima erzîya Zîndanê Xarpêtî û hema zî hucreyê yew kesî de tepişîyeno.

Emîne Şenyaşara ke mêrde û wird lajê ci ameyî qetilkerdene û yew lajê ci bîlasebeb zîndan de yeno tepiştene pîya bi lajê xo Ferît Şenyaşarî 300 rojî yo verê banê edlîye ya Riha de Nobeta Edaletî tepişena. Waştişê ci oyo ke lajê ci bêro veradayene û qetilkarî bêrê cezakerdene. Keyeyê Şenyaşarî her roje 50 kîlometre rayîr ra şino merkezê Riha û badê çalakîye agêreno Pirsûs. Her hetê Kurdîstan û Tirkîya ra semedê paştîdayîşî Şenyaşarî yenê zîyaretkerdene. Ewropa ra zî heyetan Şenyaşarî zîyaret kerdî.

Emîne Şenyaşare vat: ''Dikanê domananê mi bibi. Bi serran uca xebitîyayî. Domananê mi tim vatêne peynî ra tewr peynî no keyeyê Yildizî do sereyê feqîrêk bivêşno.Weriştî hersê xo domananê mi ra vet. Wekîlbîyayîş yeno manaya qetilkerdişî? Eşt dikanê ma ser, domanê mi qetil kerdî û destûr nêda çew înan bikero berz. Verê çimanê mi de yew nêweşxane rijna. Gama ke xebera qirkerdişî ameyî ez vazdaya. Cîrananê mi vat 'meşo ti zî kişenî.'  Ez şîya dikan her ca de gonî esta. Hûma nê kerdişê înan cayê înan de meverdo. Hema ke lajê min o pîl birîndar bi vato 'ma meberê nêweşxane uca ma kişenê.' Nêweşxane de hema ke ma domanê xo nêdîye, înan ê qetil kerdî. Dima ra zî hêrişê mêrdeyê mi kerd û zî verê çimanê mi de qetil kerd. Seba ke ez edalet wazenê mi rê dewa akerda, cezaya 4 serran wazenê. Na çi dewlet a,  no çi edalet o? Semedê caardişê edaletî ma heta Anqara û Îstanbulî şîyî. Rayîro ke ma nêşîyî nêmend. Vanê 'edalet çîn o şirê keye.'  Mi erdî zî kend mi vat belka edalet binê ci de yo. Lajê mi bîlasebeb zîndan de yo. Wa ey vera bidê. Ez hinî nêeşekena tîya vinderî, wazena pîya lajê xo şirê keye. Doman û dornê mi bêkes verdayî. Hûma dejê zerrîya ma mela bifîno zerrîya înan zî.''