Emîne Şenyaşar û Ferît Şenyaşar 400 rojî yo verê Edlîyeya Riha de nobeta edaletî rê dewam kenê.

Ewro reyna 15. veng dîya Emîne Şenyaşara ke Mudirîya Asayîşî ya Pirsûsî de îfade biba. Dîya zanayene ke bi îdîaya ke dayîke Emîne Wekîlê AKPyî Halîl Îbrahîm Yildizî rê heqaret kerdo, derheqê aye de tehqîqat ameyo akerdene.

Emîne Şenyaşar avûkatê xo reyde îfade da û dima nobeta edaletî rê dewam kerd. Emîne Şenyaşar derheqê babete de qisey kerd û vat: ''Ma rê zulm yeno kerdene. Wa lajê mi vera bidîyo. Ez bi fekê xo yê rojeyî nobete gêna û edaletî wazena. Înan ez û Ferît kuwayî, ma berdî nezaretxane. Ez bimira zî tîya ra nêwurzena.''

Ferît Şenyaşarî dîyar kerd ke selahîyetdarî înan ra remenê û ê têna edaletî wazenê.