Muhammed Emîrê efrînijî Zîndanê Elbîstanî de dinyaya xo bedilnabi û Mudirîya Zîndanî seba ci vatbi ke 'goristanê bêkesan de ameyo definkerdene.' Cenazaya Emîrî AKTyî ra ameye girewtene û Îstanbul de ame definkerdene.
Tepişteyo sîyasî Muhammed Emîro efrînij Zîndanê Elbîstanî yê Gumgumî de pê vîrusê Korona kewt û Emîrî 2ê teşrîba verêne de nêweşxaneyê dewlete de dinyaya xo bedilnaye. Emîr 28 serran ra nata zîndan de bi.
Mudirîya Zîndanî pare kerdbi ke Emîr Goristanê Bêkesan de ameyo definkerdene. Labelê eşkera bi ke cenazaya Emîrî Dezgehê Tipê Edlîyî yê Îstanbul de yo. Îdareyê zîndanî perey wasîyê Emîrî Bekîr Kayayî rê dokumentêk erşawit û da zanayene ke ganî ê 3 rojan de cenaza bigêrê û eke nêgêrê cenaza do goristanê bêkesan de bêra definkerdene.
Vizêr saete 15:00 de Bekîr Kayayî cenazaya Emîrî ATKyî ra girewt û berde Goristanê Çekmekoyî. La nêweşîya Korona ra destûr nêame dayene ke cenazaya bêra definkerdene. Naye ra dima Emîr Goristanê Çavuşbaşi yê Beykozî de ame definkerdene.
Wekîla HDPyî Dilşad Canbaz, Endamê Heyetê Rayberdşê Merkezî yê HDPyî Ferhat Encu, Hemserekê Rêxistina Îstanbulî Erdal Avci, Hemserekê Komeleya Hetkarî û Paştdayîşî ya Merdimanê Vînbîyayeyan (ANYAKAY-DER) Şêxmus Işik û xeylêk kesî tewrê merasîmê cenaza bîyî.
