Bi belgeyan vejîya meydan ke yewînîyê emnîyetî yê Almanya agahîyê ke têkildarê kurdanê ke welatê xo de ciwîyenê û muxalîfanê bînan, polîsanê tirkan reyde pare kerdê. Dewleta tirkan 6 serrî û 3 aşmî cezayê hepisî hunermendê kurdan Ozane Cane rê birnaybî. Kêna Cane Dîlan Orse seba ke maya xo zîyaret bika şîbîyeTirkîya. Verî qedexeyê teberê welatî vejîyayîşî Orse rê ameybî dayene pey cû zî Orse ameybî girewtene. Dîyar bî ke agahîyê girewtişê Dîlane Orse Midurîyetê Emnîyetê yê Almaya dayê bi polîsê tirkan.

Sebebê girewtişê Orse beşdarê çalakîya bêîteatîya sîvîle bîyayîş o ke serra 2012î de, şaristanê Kolnî de ameybî kerdene. Komêka ciwananê kurdan beşdarê çalakî bîbî û çalakî seba wedaritişê tecrîtî yo ke Rayberê Şarê Kurdî Abdullah Ocalanî ser o yeno kerdene, keştîya “Cologne 6” de ameybî kerdene.  Çalakî de tena bilawekî ameybî vilakerdene û ciwanan waştîbî ke bale biance grevê vêşanî ser ke ê demî de Strasburgî de ameyêne kerdene.

Dosya Almanya de Ameybî Girewtene Tirkîya de Ame Akerdene

Ciwanê kurdan demêk ameybî girewtiş binê nezaretî û dima ameybî veradayene. Çend serran ra dima vejîya meydan ke polîsê almanan dosyaya têkildara Dîlane Orse Seferetxaneyê Almanya yê Anqara ser o polîsanê tirkan ê Înterpolî reyde pare kerde. Na dosyaya ke Almanya de ameybî girewtene Tirkîya de newe ra ame akerdene.

Hunermenda kurdan Ozane Cane ke şaristanê Kolnî de ciwîyyayêne weçînitişê 24ê Hezîrane de seba paşdayîşê HDPyî ameybî Tirkîya. Ozane Cane 23ê hezîrane 2018î de mîtîngê HDPyî yê Edîrne de ameybî girewtene. Seba ke yew fîlmo ke behsê şerê vera DAÎŞî yê YPG keno de rol girewtîbî ame sucdar kerdene. Dadgehê tirkan 6 serî 3 aşmî Ozane Cane rê ceza birnaye. Kêna Ozan Cane Dîlane Orse seba ke maya xo zîyaret bikera ameye Tirkîya û wexto ke waşt Tirkîya ra vejîya hefteyê vîyarteyî de girîyaybî binê nezaretî. Tepîştişê Orse ra dima parlementerê Partîya Çepe Gokay Akbulutî na rewşe berdîbî Meclîsê Fedaralî. Pêro cadkerdişê rayraberdişê Berlînî ya seba veradayîşê Ozane Cane zî bênetîce mendî.