28ê kanûna 2011î de Roboskî de teyarayanê şerî sivîlî kerdbî hedef û domanî zî tede 34 sivîlî qetil kerdbî. Hemserekê HDPyî yê Îstanbulî Ferhat Encuyo ke Qirkerdişê Roboskî de birayê ci Serhat û 27 merdimê ci ameybî qetilkerdene ANFyî rê qisey kerd.

Encuyî vist vîrî ke qirkerdişî 10 serrî xo pey de verdayî la hema zî dadîyê Roboskî edalet wazenê. Encuyî îfade kerd ke seba muhakemekerdişê mesuldaranê qirkerdişî înan muracatê her cayî kerd, çalakîyî kerdî la netîceyêke nêviste destî. 

Encuyî vat: ''Semedo ke Tirkîya de dezgehê muhakemekerdişî binê tesîrê sîyasetî de yo hema zî kiştoxî pawîyenê. Keyeyê Roboskî yê ke seba edaletî têkoşîn kenê ameyî muhakemekerdene, raştê tehqîqatî ameyî, ameyî destbendkerdene û tepiştene. Hetê bînî ra dejê dadîyan hema zî teze yo. Verê ma de astengîya tewr pîle huqûq o. 34 merdim û domanî kişîyayî la no qetî nêkewt rojdemê dozger û dadgeran.

Dozgerê Qilabanî roja destpêke ra nata herinda qirkerdişî de keyeyan rê tehqîqat akerd. Mehkemeya Qanûnê Bingeyî bi îdîaya 'belge kêm o' dewa red kerde. Mehkemeya Heqanê Merdiman a Ewropa zî rixmê binpaykerdişê heqê cuye zî birêka sîyasî daye û pare kerd ke rayîrê huqûqê neteweyî bi temamî nêşuxilîyayî û dosya qebul nêkerde. O çax Komîsyonê Heqanê Merdiman ê Meclîsî Komîsyono Cêrin ê Qilabanî rona la semedo ke tede 8 AKPyî estbîyî nê komîsyonî gamêka pozîtîfe nêeşte.''

Encuyî bale ante ser ke birayê ci Velî hema zî tepişte yo û vera keyeyanê Roboskî 10 serrî yo operasyonî dewam kenê. Encuyî vat: ''Qirkerdişî Roboskî de dest pênêkerd. Verî zî dewê ma ameyî vengkerdene, vêşnayene; merdimî ameyî tepiştene. Seba ke reyna qirkerdişo winasên nêqewimîyo ez bi aktîfî tewrê têkoşînê sîyasî bîya.

Hêrişkerê Kitabxaneyê Şemzînanî vera dîyayî. Qirkerdişanê Pirsûs, Anqara û barbarîya bodrumanê Cizîre ra dima ma dî ke mesuldarî bêceza vera dîyenê. Bêcezaverdayîş bîyo metodêkê îdareyî. Ganî na hişmendîya pûçe nê erdî ra bêra vetene. Ganî merdimî vera bêedaletî wurzê payan ser. Ganî haştîye, demokrasî, azadîye û têdûştîye bêrê nê erdî ser.''