Endama HDPyî Zugurlî ameye tepiştene

Endama Meclîsê Şaredarîya Bajarê Pîlî ya Amedî ya HDPyî ya ke hetê qeyûmî ra dest nayîya ser, Şehrîbane Zugurlî ameye tepiştene.

Endama Meclîsê Şaredarîya Amedî û Şaredarîya Licê Şehrîbane Zugurlî ya ke bi îdîaya protestoyê vera destsernayîşê qeyûmî  'vera polîsan tevgêrayîşî' vizêr sereştişê keyeyan de ameye destbendkerdene, ameye tepiştene.

Zugurlî muameleyê Mudirîyetê Asayîşî ra dima ewro ameye berdene bi Edlîye. Serdozgerîye de bi îdîayanê ''hetkerîya rêxistine'', ''propagandaya rêxistine'' û ''vera polîsan mukavemetî'' îfadeyê Zugurlî ame girewtene û dima bi waştişê tepiştişî sewqê mehkeme bîye. Zugurlî mehkeme ra dima ameye tepiştene û berdene bi zîndanî.