Endamanê Koma Dostanîya bi Kurdan a Parlamentoya Ewropa François Alfonsi (Greens/EFA, Fransa) Andreas Schiederî (S&D, Avusturya) Nikolaj Villumsen (GUE/NGL, Danîmarka) partî û têgêrayîşanê kurdan rê mektubêk erşawit û înan ra waşt ke rayîr nêdê şerê zereyî.

Mektub de têkoşînê demokrasî û haştîye yê Rojhelatê Mîyanênî de bale ameye antene rolê kurdan ser û wina ame vatene: ''Koma ma ya Dostanîye weçînayîşê PArlamentoya Ewropa yê temmuza 2019î ra dima seba pawitişê têkoşînê demokrasî û azadîye yê kurdan awan bîye. Ma pê bawer ê ke kurdî Rojhelatê Mîyanênî de seba erjanê demokrasî, têkoşînê vera terorîzmî û heqanê cinîyan wayîrê rolêkê pîlî yê.

Kurdan hêrişanê Saddam Huseyîn, alozîya Sûrîye û hêrişanê DAÎŞî ra zaf dejî anyî. Kurdanê Tirkîya zî seba ke lîderê înan bi hawayêkê keyfî tepişîyenê dejê giranî antî. Ma hêrişanê Erdoganî yê vera kurdan û îşxalê erdê Kurdîstanî ra zaf qerqilîyenê.

Ganî têkilîya mabênê selahîyetdaranê kurdan û Ewropa bêra xurtkerdene. Ma amade yê ke seba azadîya kurdan hemkarîye bikerê, vera gef û hêrişan bigêrê.

Alozîya ke Başûrê Kurdîstanî de mabênê kurdan de qewimîyena ma zaf qerqilnena. Na alozîye bi hawayêkê negatîfî tesîrê ameyoxê demokratîk û azadî yê kurdan kena.

Seba afernayîşê ameyoxêkê haştîyane, demokratîk û azadî ma pabeyê ci yê ke şima meseleyanê xo bi dîyalogan çareser bikerê, rayîr nêdê hezanê xerîbanê ke kurdan seba şerê zereyî teşwîq kenê. Kurdan seba haştî û aramîye xo îsbat kerd. Coka girîng o ke şima meseleyanê xo çareser bikerê.  Seke her cayê dinya ra roşnvîrê kurdî venga şima danê ma zî venga şima danê ke seba servistişê ney destê şima ra çita yeno do bikerê.

Seba çareserîya mesele ma zî amade yê ke bikewê dewre. Ma wazenê şima reyde nîqaşan bikerê, hemkarîya şima bikerê. Ma pê hêvîdar ê ke no mektub do bala şima bianco. Ma pabeyê cewabê şima yê û eke îmkanê weşîye rayîr bidê ma pê hêvî kenê ke bieşkê şima nas bikerê. Ma selamê xo erşawenê wayûbiratîye.''