Endamê HDPyî Dogan Erbaşî ard ziwan ke seba çareserîya demokratîke ya meseleya kurdan ganî rayîrê Îmraliyî bêrê akerdene. Erbaşî venga CPTyî da ke vera sîstemê tecrîd û îşkenceyî yê Îmraliyî têbigêro.
Endamê HDPyî û avûkatanê verênan ê HDPyî ra Dogan Erbaşî derheqê sîstemê îşkence û tecrîdî yê Îmraliyî de ANFyî rê qisey kerd.
Erbaşî vat: ''Îmrali de sîstemê îşkence û tecrîdî esto. Kerdişê Îmraliyî îlegal û keyfî yê. 21 serran de mîsalê sey 'Qanûnanê Ocalanî', 'Kerdişanê Ocalanî' ameyî caardene. Binpaykerdişî hêverî Îmrali de dest pêkenê û dima zî pêro Tirkîya ra vila benê. Mîsal qeydkerdişê pêvînayîşê avûkatan hêverî serra 2005î de Îmrali de dest pêkerd. Îmrali sey laboratuwarêk şuxilîyeno.
CPTyî raporê xo yê menga tebaxe de sîstemê Îmraliyî eşkera kerd. Meclîsê Parlamenteran ê Konseya Ewropa (MPKE) zî waşt ke şertê raporî wa bêrê caardene û vat ê do mesele teqîb bikerê. Ma venga CPTyî danê ke seba ke şertê raporî bêrê caardene hîna zêde têbigêrê. Sere de Almanya welatê Ewropa seba ke zerar nêreso bazirganîya înan a bi Tirkîya bi hawayêkê sistî têgêrenê û sîstemê Îmraliyî peygoş kenê.''
Erbaşî îfade kerd ke tecrîdê vera Rayberê Şarê Kurdî Abdullah Ocalanî ganî têna hetê huqûqî ra nêro ercaneyene û vat: ''Ewro bi sîstemê tecrîdî 'tewirê Îmraliyî' yê Birêz Ocalanî yeno cezakerdene. Birêz Ocalan îradeyê haştîye û hêvîyê çareserîye yo. Seba ke xeta Birêz Ocalanî nêna dîyene pêro krîzê Tirkîya benê giranêr. Ma prosesê çareserîye de dî ke Birêz Ocalanî senî haştîya komelî arde ca.''
Erbaşî bale ante rojdemê 'reformî' ser o û vat: ''No rojdem mojneno ke krîzê Tirkîya bîyî giranêr. Goreyê ma seba ke Kombîyayîşê Yewîya Ewropa yê 10-11ê kanûne de ambargoyê vera Tirkîya do bêro nîqaşkerdene û komel îqtîdarî rê paştî nêdano no vatişê 'reformî' kewt dewre. Reformo raştikên pê çareserîya demokratîke ya meseleya kurdan beno. Mefteyê na çareserîye zî vurnayîşê sîstemê Îmraliyî de yo.Ganî rayîrê Îmraliyî bêrê akerdene.''
