Mesuldaranê Qirkerdişê Sêwasî ra Hayrettîn Gulî bi bira Serekkomar Erdoganî vera dîyabi. Serekê Komeleya Kulturî ya Pîr Sultan Abdalî Cuma Erçeyî derheqê veradîyayîşê Hayrettîn Gulî de ANFyî rê qisey kerd.

Erçeyî vist vîrî ke zîndanan de tewr tay 2 hezar nêweşê giranî est ê ke rewşa zafê nînan yê Gulî ra giranêr a. Erçeyî îfade kerd ke veradîyayîşê Gulî mojneno ke dewlete kiştoxanê Sêwasî pawena û vat: ''Seba veradîyayîşî yeno vatene ke 'hetê rewşa merdimatîye ra ameyo ercnayene.' No qisey seba kiştoxêkî yeno vatene û merdiman hîna zaf dejneno. Werte de yew sûcê merdimatîye, sûcê qirkerdişî est o.Sûcanê vera merdimatîye de erk û heqê merdiman û dezgehan çin o. Dewlete destpêkê Qirkerdişê Sêwasî ra nata qirkeran pawena. Nê kesê ke bi îdîaya 'Bultenê Sûrî' gêrîyenê Almanya de zewijîyayê û bîyê wayîrê domanan. Cafer Erçakmak rixmo de derheqê ci de bulteno sûr est bi Sêwas de merdo û ameyo definkerdene.''

Erçeyî bale ante ser ke dewaya vera Qirkerdişê Sêwasî de kiştoxê karmendê dewlete, şaredarê Sêwasî, wezîrê karanê zereyî û fermandarê cendirmeyan qetî nêameyê muhakemekerdene.

Erçeyî ard ziwan ke mesuldarê qirkerdişî nêameyî cezakerdene la ameyî xelatdayene. Erçeyî vat: 'Wextê weçînayîşî de îqtîdarî şirîkanê xo de veradîyayîşê qirkeranê Sêwasî ser o bazarîye kerde. AKPyî seba Huda Par û Yeniden Refahî nê kiştoxî vera dayî, seba MHPyî zî serekê mefyayan vera dabî.''

Cuma Erçeyî da zanayene ke avûkatê dewaya Qirkerdişê Sêwasî vera veradayîşê Hayrettîn Gulî îtîraz bikerê. Erçeyî venga pêro kesan da ke 14ê êlula 2023yî de tewrê roniştişê dewaya vera Qirkerdişê Sêwasî bibê.