Zîndanê Ereglî yê Konya de 4ê teşrîna verêne de, 40 tepişteyan vera tecrîdê giranî û binpaykerdişê heqan grevê vêşanîye dabi destpêkerdene. Tepişte Yakup Brukanliyî vera tecrîdî 28ê teşrîna verêne de bedenê xo dabi adirî ver.

Tepişteyê grevê vêşanîye hucreyê yewkesî de tepişîyenê. Tepişteyê bi nameyê Mehmet Işiktaşî pêvînayîşê bi keyeyê xo de da zanayene ke 11ê tebaxe ra nata tepişteyî hucreyê yewkesî de tepişîyenê.

Işiktaşî vat: ''Selahîyetdarê zîndanî cewab nêdanê waştişanê ma, vera ney ma do grevê vêşanîye rê dewam bikerê û heta peynî xo ver bidê. Tepişteyanê nêweşan zî waşt ke selahîyetdaran de pêvînayîş bikerê la cewab nêdîyeno înan. Eke waştişê hewteyê verê ma de nêrê qebulkerdene ma do grevê xo bivurnê grevê vêşanîye yê bêdem û bêagêrayîşî.''