Wekîla katalane Eulalia Reguant venga komelê mîyanneteweyî da ke vera hêrişanê serê Rojawanî têbigêro û vat: ‘’Dewleta tirke bi serran o hêrişê sivîlan kena. Ma verê ney de bêveng nêmanê. Modelê Rojawanî ganî bipawîyo.’’
Wekîla CUPî ya Parlamentoyê Katalonya Eulalia Reguant derheqê hêrişanê vera Rojawanî de ANFyî rê qisey kerd.
Eulalia Reguant hêrişê dewleta tirke yê vera Rojawanî sey xîretê îşxalî pênase kerdî û vat: ‘’Dewleta tirke hêrişê Rojawanî û şarê ci yê sivîlî kena. No şer hetê tek terefî ra yeno kerdene. Rojawanî ra vera dewleta tirke gefêk çin o. Dewleta tirke hêrişê sivîlan kena. Armancê dewleta tirke yo bingeyîn û milîsanê ci kontrolkerdişê herême yo.
Erdogan keno ke Rojawan de hegemonyaya Osmanîyan awan bikero û komelo mîyanneteweyî ganî verê ney de bêveng nêmano. Şar neçare maneno ke koç bikero. Tirkîya herême de bi temamî polîtîkaya kaos û şerî ana ca.’’
Eulalia Reguant ard ziwan ke rijîyayîşê rejîmê Esadî girîng o la ganî verê îdareyê HTŞyî de hişyar bibo. Eulalia Reguant vat: ‘’Ma zanenê ke HTŞ têgêrayîşêko îslamî yo radîkal o. Ganî Sûrîye de modelêko demokratîk yanî modelê îdareyê Rojawanî bero esaskerdene. Modelê Îdareyê Xoserî yê Rojawanî tena seba Sûrîye ney seba pêro herême çimeyêkê hêvîye yo.’’
